3 tylli ki shuki Myntri, dang ïakren halor kiwei ki shuki kynthup shuki Lamphang

Da ka Peoples Alliance thaw ka UDP-PDF ban ïatreilang bad ka NPP

0

Shillong, Lber 5 : Ka United Democratic Party (UDP) bad ka Peoples Democratic Front (PDF) kiba la ïa kynduh hynnin ka janmiet ha ïing sah jong u ma Kyrmen Shylla MLA ka Khliehriat hangne ha nongbah Shillong ki la shim ïa ka rai ban thaw da ka Peoples Alliance (PA) khnang ban leit kyrshan ïa ka sorkar ban ïalam da ka NPP hapoh ka juh ka lama.
Kat kum ka tyllong khubor la ïakren ruh bad ki nongïalam ka NPP ba kin ai bhah ïa ka PA lai tylli ki shuki myntri. Nalor kane ïa kiwei kiwei ki shuki kumjuh ruh halor ka shuki Lamphang ruh kin dang ïakren ïa pynbeit lashai ka sngi hadien ba la dep bam smai ki MLA ha ïing Dorbar ha Rilbong.
Ka khubor ka ïathuh shuh shuh ka daw ba ka UDP bad ka PDF ka leit ban kyrshan ïa ka NPP ka dei halor ka nongrim ba ki arngut ki MLA ka HSPDP bad uwei u Independent ki la leit ai jingkyrshan ïa ka NPP. Kumta haba ki la kheiñ jingkheiñ bad ym lah leh ei ei shuh namar la duna paid lypa kumta ki ruh ki la shim da ka rai ban ïatrei lang noh bad ka NPP kumba la ïatrei lang ha kine ki san snem ba la dep.
Haba ïakren bad uwei na ki nongïalam ka PA u bym kwah ban pynpaw kyrteng u la ong “Ngi la pyrshang ban pynhun ïa ka jingthrang jong u paidbah ban thaw da ka sorkar ban ïalam da ki seng riewlum hynrei haba arngut ki paralok na ka HSPDP ki la phet noh bad ai jingkyrshan ïa ka NPP kumta ngim banse ngi ruh ngi hap ban ïatrei lang khnang ban ïoh ïaka sorkar kaba skhem namar hadien ba ngi la sngewthuh ba ka jingpyrshang ban thaw ïa ka sorkar kaba khlem ka NPP bad BJP ka la pulom kumta ngi ruh ngi la rai ban ïatrei lang noh kumba la ïatrei lang ha ki san snem ba la dep khnang ban ïoh ïa ka sorkar kaba skhem bad kaba lah ban ai ka jingshakri ïa ki paidbah ha ki baroh ki liang”.

Leave A Reply

Your email address will not be published.