Ngim kwah ba ka wah Nonbah kan kylla long kum ka wah Umkhrah ong u president ka GTFM

Nongstoiñ Nohprah 21: Ka GreenTech Foundation Megalaya India ka dei kawei na ki kynhun kiba trei na ka bynta ka khuid ka suba da kaba pynlong ïa ki cleaning drive ha kylleng ki shnong hapoh ka jylla.Kumta mynta ka sngi katei ka kynhun ba la lam khmat da u samla H.Ban Nonglang uba dei u president ha ryngkat ka jingïatrei lang bad ka Latynrai Eco Tourism Co – operative Society West Khasi Hills bad ba la ïashimbynta lang da ki dkhot ka GTFMI West Khasi Hills Divission ki la shim khia da kaba pynlong ïa ka jingpynkhuid ïa ki jaboh jabaiñ ha ka wah Nonbah.Ïa ka jingpynkhuid ïa ka wah Nonbah la leh da ka buit thymmai da kaba ki la pynap lypa da ka jar ban khang bad pynsageh ïa ki jaboh jabaiñ kiba la wan kit da ka um da kaba pynap da ka jar na shiliang sha shiliang kumba pynap dohkha ki briew.
Da kaba pynap ïa katei ka jar baroh ki jaboh jabaiñ kiba per bad kit da ka kum kum ki bilor , ki plastic , ki jaiñ jot bad kiwei kiwei kiba ka um ka kit ki sahkut shi jaka bad na katei ka jaka ki sa leit ban lum bad thep ha ki byrni ynda ka kali kit ñiut ka la wan ki sa thep bad leit bret ha ka jaka bret ñiut kaba la pynkhreh lypa.
Ha shuwa ban sdang ïa ka jingtam ïa kitei ki jaboh la pynlong ïa ka jingpynshai paitbah ha kaba u bah H.Ban Nonglang president u la ai ïa ka jingpynshai.
U bah Nonglang haba ai jingkren ha katei ka jaka u la ong ba ka katei ka kynhun kam kwah ban ïohi ba ka wah Nonbah bad ka wah Nondeiñ kiba don ha pdeng sor Nongstoiñh kin kylla long kum ka wah Umkhrah, Umshyrpi bad kiwei kiwei ki wah kiba ka jingjaboh ka la ishyrkhei bad kim long shuh wat tang ban sum ban sait ruh.
Utei u nongïalam u la ong ruh ba ka kynhun ka la dep aid a ki jingthoh sha u Deputy Commssioner , ka ohis PHE, U Syiemk a hima Nongstoiñ bad baroh ki rangbah shnong kiba hap ha ka Nongstoiñ Town Area ba kin ai ka jingïatreilang ban pynlong ïa kitei ki artylli ki wah kiba khuid .
Nalor kata u la ong ruh ba ka kynhun ka la pynkhreh ïa ki kot lynkdop ban pynpoi ha man la kawei pa kawei ka thliew ïng ba kin pule bad kin sngewthuh ba ka jingkhuid jong ki wah ka long kaba don kam haduh katta katta na ka bynta ka jingkoit jingkhiah.
Nalor kata u la ong ruh bay m lah ban len ba ka jingpynjaboh ïa kitei ki wah ka dei da ki ba shong dukan bad shong ïng harud kitei ki wah.Ha kajuh ka por u la kyntu ïa kiba shong dukan bad shong ïng harud kitei ki wah ba kin ai ka jingïatreilang ym da kaba hiar sha poh wah ban leit tam ïa ki jaboh hynrei tang dakaba sangeh shisyndon ban bret ïa ki jaboh jabaiñ ha kitei ki wah.
U la ong ruh ba mynta ka kynti ka dang dei tang ka jingkyrpad hynrei lada ki nongshong dukan, ki ba shong ïng kim sngap kan poi ka por ba ki nongïalam katei ka kynhun kin ai shi syndon da ka hukum ba kito ki trai dukan bad ki trai ïng kiba shong harud kitei ki artylli ki wah ki hap ban hiar da lade sha poh um ban tam ïa ki jaboh bad kit ban leit bret hi ha ka jaka klaba la don lypa.
Nalor kata u la ong ruh ba ka kynhun ka la pynkhreh ruh shibun tylli ki jaka khang ban pynsangeh ïa ki jaboh bad ruh ban buh da ki lieng kynda bad ki nongkieng ïa kitei ki lieng kynda ba kin tam ïa ki jaboh bad ba buh ruh da ki kynja mashin kiba lum ban lang ïa ki jaboh jabaiñ ym shuh ban lum da u briew.