Khliehriat, nohprah 20: Halor ka jingthmu ban iarap lem ïa kito kiba don ka jingpang Tuberculosis kumta myn ha ka 20 tarik u nohprah, ka sngi jong ka National Tuberculosis Elimination Programme bad ruh la pyllait paidbah ïa ka Pradhan Mantri TB Mukt Bharat Abhiyan (PMTBMBA), ka ophis jong ka District Tuberculosis Officer, Jaiñtia Hills ha ryngkat ka jingïatreilang bad ka tnat CSR jong ka company Star Cement Limited, Lumshnong ka la pynong ai ka jingsam jingbam ei ïa kito ki briew kiba don ia ka jingpang Tuberculosis, ïa kane ka prokram la pynlong ha Sutnga CHC, la ïa don ryngkat lang ruh ka District Tuberculosis Officer, Jaiñtia Hills, ka Dr. E.B.V Laloo, ka Medical Officer in-charge Sutnga CHC, Dr. R Toi, u Manager-CSR, Star Cement Limited, Lumshnong, u Kingshok K. Borah bad kiwei kiwei.
Haba kren ha ka jingïalang, ka Dr. E.B.V Laloo ka la maitphang shibun kiei kiei kiba dei ki lad ki lynti ba ki nongpang ki dei ban leh ha iïng ban ïada na ka jingsaphriang kane ka jingpang Tuberculosis ba kane ka jingpang kan nym bit ïa kiwei pat kiba don lang ha iïng ha sem, ka kyntu ruh ba ki dei bna long tista bad minot ban dih ïa ki dawai ban shim ïa ki lad jingsumar kumba la bthah da ki nongsumar kiba na ka tnat ka koit ka khiah ban dup koit kloi na ka jingpang, ha kajuh ka por ka pynshai bad iathuh ruh ïa ki jait skim bapher bapher bad ka jingiarap da ka pisa ha ka por ba ki dang don hapdeng ka jingsumar, kane ka long na ka bynta kito kiba pang Tuberculosis.
Ka Dr Laloo, ka pynpaw ruh ka jingsngew nguh bad ai khublei ïa ki nongtrei jong ka company Star Cement bad ïa ka company Star Cement Limited kaba la theh jingiarap da ki jingbam tei met ïa kiba pang Tuberculosis bad ha kajuh ka por ka khot lang ruh ia baroh ki dkhot jong ka imlang ka sahlang ba kin shim bad ai ia ka jingïatreilang bad ki ASHAs, kumjuh ruh bad ka tnat ka koit ka khiah khnang ban dup lang ban pynlong ïa ka imlang ka sahlang kaba lait na kane ka jingpang Tuberculosis.
U Manager-CSR, jong ka company Star Cement Limited, Lumshnong, u Kingshok K. Borah, u la ong ba ka company Star Cement Limited, Lumshnong, katba lah hi kan iai bteng bad shim khia ban pynbiang pynbit ïa ki jingdonkam jong kiba pang Tuberculosis.
Kiwei pat kiba la ai jingkren ki kynthup ka Medical Officer in-charge Sutnga CHC, ka Dr. R. Toi, u Senior Tuberculosis Laboratory Supervisor (STLS), u bah Watson Siangshai bad u Senior Treatment Supervisor (STS), u bah Linus Manner.
Ki jait jingbam kiba la sam sha kiba pang Tuberculosis, ki kynthup u khaw, ka pylleng, ka umphniang bad kiwei kiwei ki jait jingbam, ki la don haduh palat ia ka 30 ngut kiba pang Tuberculosis kiba la poi sha kane ka prokram ha katei ka sngi.
