Khliehriat nohprah 21: Ka Khasi Students Union Wapung Unit bad Ladrymbai Unit myn ha ka 20 tarik mynta u bnai nohprah ka la leit ban iakynduh ïa ka Additional Deputy Commissioner ka East Jaiñtia Hills District bad buddien halor ka jingdawa ban maramot noh kloi ïa ka surok Lad Rymbai Bypass kaba la jot rathai ka ba khlem maramot shuh mynta la bun bun snem.
Ka seng ka la dep ban buh ïa ka jingdawa naduh ki bnai kiba la leit bad kam shym la don satia kano kano ka dak ban maramot ïa katei ka surok bypass, kumta ka la pynlong ïa ki nongïalam bad ki dkhot ka seng ban kynduh ïa ki heh jong ka district bad buddien halor kane ban maramot kloi, ka jingdawa jong ka seng ka dei namar ba mynta la don kumba ar taïew ki kali heh ba kit jingkit ki la ïaid na kane ka surok khnang ban tehlakam ïa ka jingdheng kali ha Ladrymbai bad ha Khliehriat, kumjuh ruh ban pynsuk ïaka leit ka wan ha ka thaiñ Ladrymbai.
“Kumban shu pynkynmaw ka seng halor kane lyngba ka Wapung unit ka la leit ban buh jingthoh nyngkong sha u EE PWD Roads Khliehriat Division ha ka 22 tarik u Nailur 2022 bad kane ka kynti kaba mynta ka seng ka ngeit skhem ba ka tnat ba dei peit kan maramot noh ïa kane ka surok khang ban pynsuk iaka leit ka wan ki paidbah.
Ka seng ka iohi ba ka jingiaid ki kali heh na kane u surok ka la iarap shibun bad pynduna ïa ka jingdheng kali ha shi lynter ka surok bad ha ïew Ladrymbai bad ïa u surok dei ban maramot noh bad pynbha khnang ba ki kali heh kiba iaid ruh kin nym jynjar than bad ba kin suk, ka seng kan sa ai ruh iaka copy jong ka dorkhas sha u EE PWD roads Khliehriat Division halor kane ka mat.Khliehriat ” ong u kyrwoh na ka seng.
Ka seng ka pynpaw ruh iaka jingsngew nguh bad ai khublei ïa ka tnat pulit kaba la shim khia ban pynduna ïaka jingdheng kali bad na ka liang ka seng ruh kan nang iai bteng ban ia ïa ka jingiatreilang ha kino kino ki mat kiba ktah bad ki ban wanrah jingmyntoi ïa u paidbah.
