Leit shim bynta u Symbut Myntri rangbah ka jylla ha ka tamasa Ri Kunai La Tynrai ha Ri Bhoi

Nongpoh, Nohprah 21: Kum kawei na ka kynhun jong ki nongrep bad nongthaiñ jaiñ ha ka thaiñ Umden Nongtluh ha Ri Bhoi District ba la tip kum ka ‘Nongtluh Eri Farmers Association’ ha ka wat kaba san ka la pynlong biang ïa kawei na ka tamasa ba la tip kum ka ‘Ri Kunai la tynrai’ kum ka thong ban pynneh pynsah ïa ki tynrai ba kynthup naduh ka riam, ka beit ka bam ka dih, ka kup ka sep bad kynthup ruh ka rwai ka siaw bad ka tem ka put tynrai.
Ïa kane ka tamasa Ri Kunai La Tynrai la pynlong ha Madan ka shnong Umden, ha kaba u symbut Myntri rangbah ka jylla, u Bah Prestone Tynsong u la wan ban shim bynta kum u kongsan bad u MLA ka Nongpoh Constituency, u Bah Mayral Born syiem kum u symbut kongsan. Kiwei kiwei kiba la ïa sakhi lang ha ha kane ka sngi ki kynthup naduh u Bah Marchborn Syiem, dkhot ka Synjuk ki Rangbah shnong ka Raid Nongtluh, ka Kong T. Syiem, kaba dei ka Syiem Sad ka Raid Nongtluh, ka B. Mallai, President ka NEFA bad kiwei kiwei ki riewpaw khmat ka thaiñ.
Kum ban pynpaw, kane ka Nongtluh Eri Farmer Association bad ka Tamasa Ri Kunai La Tynrai ka dei ka shnat treikam ka Eri Organization bad kane ka kynhun ka la don la ki jong ki aiñ ne ki kyndon treikam da ka jingthmu ban ri bad kunai ïa la ki tynrai naduh ka shad ka tem, ka rwai ka siaw, ka riam ka beit, ka lehniam bad kiwei kiwei.
Kumba la sakhi lyngba jong kane ka Ri Kunai La tynrai, la iohi ba ka Raid Nongtluh ka dei kawei na ka Raid kaba riewspah ha ka jinglong tynrai, kata kynthup naduh ka shad ka tem, ka put ka tem tynrai, ki riam tynrai bad ruh ki don kata ka mynsiem ban ïada kyrpang ïa u khñiang ryndia, ba katei ka thaiñ ka paw bha ha kajingpynmih ïa ksai ryndia ba ki thir ki thaiñ na ka skop jong u Khñiang ryndia.
Haba ai jingkren ha kane ka sngi kum u kongsan, u Symbut Myntri Rangbah ka jylla, u Bah Prestone Tynsong, u la ai khublei kyrpang ïa ka Nongtluh Eri Farmer Association kaba la lah ban pynlong ïa kum kine ki tamasa ban pynpaw pyrthei ïa la ka riti ka dustur ne ka jinglong tynrai, namar kum ka jaid bynriew ka dei ban sngewthuh ïa ka jingkordor jong ka jinglongtynrai khnang ba ka jaid bynriew jong ngi kan dang kiew shaphrang ha baroh ki liang.
U la ong ruh ba u sngewtynnad ban iohi ba ki Longkmie ki pynlong ïa kum kane ka tamsa namar ngi kum ka jaid bynriew Khasi ka riti ka dustur ne ka jinglong tynrai ka shnong ha ki Longkmie ba kin ri la ka riti ka duster ne ïa baroh ki jonglong tynrai ba ka riti ka dustur jongngi ka ai bor ïa ki Longkmie kaba shim ïa ka jaid ka khong.
Shuh shuh, u la bynrap ruh da kaba ong, ba bun kita ki nongïalam kiba kam ba ki dei ki nongïalam ki pyrshanng ban ïalam bakla sha ki paidbah da kaba kular ïa ki kam ki jam sorkar, hynrei ban ong ban ai kam ai jam ïa baroh ki samla ka long kaba bakla, hynrei kane ka sorkar ka pyrshang ban thaw da ki lad ki lynti bad khamtam ban ïa trei bad ki SHG ne kiwei kiwei ki kynhun ban seng kam lajong khnang ba ki khun samla bad ki paidbah kin dup lah ban kyrshan ïa ka jingim naba ban ai kam sorkar ïa baroh ki khun samla kiba la kot da ki phew hajar kam dei ka kam kaba suk, u la bynrap.
Namarkata, kum u symbut myntri ka sorkar jylla, U Bah Prestone Tynsong u la kyntu ïa ki paidbah bad khamtam ki khun samla bad ki longkmie ba ki dei ban ieng ha la ki jong ki kjat bad ym tang ban shañiah ha ka kam sorkar, namar na ka liang ka sorkar ka la wan rah shibun ki skhim sorkar ban ai bor ïa ki samla bad ki Longkmie khnang ba kin lah ban ieng ha la ki jong ki kjat da kaba kin trei ïa la ki kam lajong lyngba ka jingkyrshan jong ka sorkar jylla.