Shillong, Nohprah 16 : U Chief Executive Member (CEM) ka KHADC Bah Pynïaid Sing Syiem u la ong ba kum ka Council kim kwah satia ban ïohi ba ki wah kiba don ha rilum Khasi kin kylla dur lut kum ka Wahumkhrah bad dei na kata ka daw ki kwah ban pynkhlaiñ ïa ka jingïada ym tang ïa ki wah hynrei wat ïa ki dohum dohwah.
U CEM u la ïathuh ba ka jingthmu jong ki ban wanrah da ka Amendment Bill lane ka jingpynkylla ïaki katto katne ki kyndon jong ka Fisheries Act ka long ruh ban ai bor ïa ki shnong ki thaw ban treilang bad ka council na ka bynta ban khanglad ïa ka jingpynjaboh ïa ki um ki wah bad kumjuh ruh ïa ki tyllong um.
“Ngim kwah ban ïohi ba ki wah kiba don ha rilum Khasi kin kylla Wahumkhrah lut bad dei na kane ka daw ka Council ruh ka pyrkhing bha ha ka jingpyntreikam ïa ki kyndon shna iing shna snem ne ka building byelaws,” u la ong.
U CEM u la ïathuh ruh ba katkum ki kyndon shna iing jong ka Council, la kdew ruh ba katta phut ne katta mitar na ka wah la mana ban shna iing harud weah bad na ka liang ka Executive Committee ka kyntu ïa ki paidbah ban ïatrei lang halor kane ka bynt na ka bynta ka khuid ka suba ha ki liang baroh da kaba bud pyrkhing ïa ki kyndon jong ka building byelaws.
Haba jubab pat halor ka jingkylli halor ka jingslem palat ban ai jingbit ban shna iing ha u pud u sam jong ka Council, u CEM u la ong ba mynshwa kadei ka jingshisha ba ka slem palat hynrei mynta naduh ba shimti ka EC thymmai ka rukom treikam ka la pher namar ki la pynstet bad ïaid beit.
