Bangalore, Nohprah 16 : Kum ka lad ban ïarap ha kaban kyntiew ïa ki nongrep bad ban pynpaw nam ïa ka jingthiang u sohñiamtra, ka Sorkar Jylla lyngba ka tnad Agriculture ka la wanrah ïa u sohñiamtra ha Nongbah Bengaluru jong ka Jylla Karnataka ha ka Zestfest Meghalaya Khasi Mandarin.
Ïa kane ka prokram Zestfest Meghalaya Khasi Mandarin la pynlong ha Lulu Mall, Bengaluru hynin ka sngi ha kaba ka Dr. Mazel Ampareen Lyngdoh Myntri jong ka tnad Agriculture jong ka sorkar Jylla ka la wan ban sakhi lang ha ryngkat ki ophisar.
Ka sorkar Jylla dang ha u Nailar mynta hi u snem ka la pynlong ïa ka tamasa sohtrun ha Nongbah Delhi ïa kaba la pynlong ha Dilli Haat ha kaba ki paidbah jong ka Nongnah lem bad kiwei kiwei ki Jylla, ki briew na kiwei pat ki ri ki la ïaroh ïa ka jingthiang u sohtrun ba pynmih napoh Meghalaya.
“Ka long ka jingkmen kaba khraw na ka bynta ki nongrep jong ka Jylla baieit jong ngi. Mynta ka janmiet nga wan kyrpang shaduh Bangalore bad nga ïalam ïa kine ki Farmer Producer’s Group, ki organisation, ki self help group bad kiwei ki kynhun nongrep kiba la ïateh bad ka sorkar ban wanrah ïa u sohñiamtra ha kane ka jylla,” ong ka Kong Ampareen Lyngdoh.
“Dang shen ngi la leh kumjuh hapoh Nongbah Delhi ba por ba ngi ïalam ïa ki nongrep hapoh New Delhi bad ha katei ka tamasa ka la pynpaw nam shi katdei eh ïa u sohtrun jong ngi. Mynta pat ngi wanrah sa ïa u sohñiamtra sha kane ka thaiñ Karnataka ba ngin die ïa kine ki soh,” la ong ka Myntri.
Ka Myntri ka la ïathuh ruh ba ka Sorkar Jylla ka la dep ban ïasoi ïa ka sorkular bad ka Lulu Mall kaban neh ar snem kaba dei shi bynta ban ïarap ïa ki nongrep ba kin wan ban die ïa ki mar ki mata.
“Ngi la ïateh soskular bad ka Lulu Mall kaban neh ar snem bad ki group bapher bapher na sawdong ka Jylla kiba treh ban wan bad la ai ïa ki ïa kane ka lad ba kin wan die ïa kine ki mar ki mata kum u sohmynken, slasha, shynrai, sohmarit, soh manir nalor kiwei kiwei.”
Ka la ong ruh ba kadei sa ka pali jong ki nongrep ba kin shim kabu ïa kaei kaba ka sorkar ka la plie lad plie lynti bad ban leh bha. Shuh shuh ka la ong ruh ba ka sorkar mynta kan pynlut pisa sha ki katto katne ki group ban wanrah ïa kita ki teknoloji kiba thymmai ban ïarap pynkiew ïa u mar uba mih na kper jong ki nongrep ban pynïaid ïew ym tang hapoh ri India hynrei sha ki ri jong ka pyrthei.
Ka la ong ruh ba kin don beit kiba wohdaw ïa ka sorkar ha ka jingïaid lynti ban pynkiew ïa ki nongrep, hynrei ka la ong ba kiba kum kita kidei tang kiba lyngkot ka jingmut jingpyrkhat bad na ka liang ka sorkar kan ïakren bad ki kynhun nongrep kiba don ka jingmut jingpyrkhat kaba heh bad kiba don ka thong ban kyntiew ïa ka rep ka riang.
Kane ka Zestfest Meghalaya Khasi Mandarin ka la sdang naduh ka 14 tarik bad yn pynkut ïa ka ha ka 17 tarik Nohprah 2023.
