Ngim ju biah ha ka pliang bamja lajong : Kynthah tyngeh u hehduh NPP ïa ka UDP ha Krang

Shillong, Ïaiong 01 : U National President ka NPP, Conrad K Sangma ha ka jingïalang ïalap elekshon na bynta u kyrtong ka party ha Sohiong u la kynthah tyngeh ïa ka UDP kaba dei kawei na ki party kaba donlang ha ka sorkar halor ka jingkynthoh palat pud jong ka ïa ka NPP ha ki rynsan ïalap elekshon.
Haba kren ha katei ka jingïalang kaba long ha Krang, u Conrad uba dei ruh ha kajuh ka por u Myntri Rangbah ka jylla u la ong ruh ba ki don ki seng saiñpyrthei kiba ïai bteng na kawei ka sngi sha kawei pat ban kren kynthoh ïa ka party.
Lah ban kdew hangne ba ka la don ka thma ktien kaba jur bha hapdeng kitei ki ar tylli ki party ha ka jingpynkhreh ïa ka elekshon kaban sa long shen ha ka 10tarik mynta u bnai.
Shuh shuh u ong ruh ïa ki paidbah ba kim dei satia ban sngap ïa kiwei pat ki sengsaiñ pyrthei da ki kyntien ba pohdor da kaba kam ruh ba u ngeit ha ka politik kaba donburom ym ban shu bein bad pynlong kam biria ïa kiwei pat ki sengsaiñ pyrthei.
“Kin trei lang bad ka NPP ha ka por ba ki sngew bïang na bynta jong ki bad haba la poi pat ka por ïalap elekshon, kin sa kren pyrshah ïa ka NPP. Kumta, nga kwah ban ong ïa ki ba ha ka kolshor jong ka ri India bad ruh ha ka kolshor jong ki Khasi bad Garo, ngim ju biah ha ka pliang bamja lajong.”
U Conrad u la kynthoh ruh ïa kitei ki sengsainpyrthei kiba wanrah pynban da ka politik pynïapait kaba dei ka jingpyrshang ka bym itynnad satia na ka bynta ki paidbah bad ka jylla.