Shillong, Jymmang 01: Ka Bharatiya Janata Party (BJP) ha ka sngi Nyngkong ka la maham ïa u Bah AL Hek ba u dei ban kham antad haba kren ïa ki kam ka party sha ki lad pathai khubor.
Haba kren sha ki lad pathai khubor u President ka BJP u Bah Ernest Mawrie u la ong ba na ka liang ka party ha kine ki khyndiat sngi kiban sa wan kan sa pynmih noh da ka jingbthah ïa baroh ki dkhot ba kim dei ban leit sha ki lad pathai khubor ban kren ïa kino kino ki kam party.
Lah ban kdew ba kane ka jingthmu ka BJP ban pyrkhing ïa ki dkhot ka BJP ban kren sha ki lad pathai khubor ka long hadien ba u Bah AL Hek u la kren beit phlak sha ki lad pathai khubor ba dei ban pynlong da ka elekshon na bynta ban jied thymmai ïa u President ka party ha ka jylla.
“U Bah Hek u dei u Myntri ha ka sorkar ha ka jaka ba un kren ïa ki kam ka party ka dei ha ka jingshisha ban peit pyrman bha ïa la ka tnat ba u bat ba ki jingtreikam kin long kiba ïaid beit ïaid ryntih,” u la ong.
U la ong ba ka party kan sa ap ïa ki jingbthah na Delhi la ban khot pan jingpynshai ne em ïa u Bah Hek halor katei ka jingkren jong u.
Haba ïadei bad ka jingdawa jied thymmai ïa u President na ka liang u Bah Ernest u la ong ba dei ka party na Delhi kaban shim rai halor kane ka bynta.
“Ha ka National Executive Committee jong ka party kaba la long ha Delhi ha ka 13 tarik Kyllalyngkot la rai ban pynjlan biang ïa ka jinglong President u JP Nadda haduh u 24 Jylliew 2024 bad kaba mut baroh ki President ka party ha kiwei ki jylla ruh la pynjlan lang,” u la ong.
Haba kylli la un hiar shuki noh kum u President, “Katba ka party ka bthah ngan kohnguh beit ïa kata,” u la jubab.
Haba kren ha halor ka jingbym lah ka party ban leh bha ka pary ha kane ka elekshon kaba dang shu dep u la ong ba ki paidbah kin sa babe baroh san snem namar lada ki ailad ïa ka BJP ban ïalam ïa ka sorkar kan kring ïa shibun bah ki kam pynroi ha ka jylla.
“Phin peit tang ha ka jylla Assam kaba don mar syndah bad ngi ka la kiew bha ha ki kam pynroi naduh ba wan ka BJP ha ka bor bad nga ngeit ki paidbah ruh mynta ki la sngewthuh ïa kane,” u la ong.
