Ngi kyrshan ïa ka VPP halor ka nongrim ba ki shim ïa ka Reservation Policy: UHM

Naei ïoh dewïong ki karkhana coke

0

Shillong, Ïaïong 01: Ka United Hynñiewtrep Movement (UHM) ha ka sngi Saitjaiñ ka la pynpaw ïa ka jingkyrshan kaba pura halor ka nongrim ba ka Voice of the Poeple Party (VPP) ka la shim ha kaba ïadei bad ka jingdawa ban pynbeit biang ïa ka Reservation Policy bad kumjuh ïa ka Roster System.
Haba kren sha ki lad pathai khubor hadien ba la wai ka jingïalang ka General Executive Council, u President ka seng u Bah Charlie Rani u la ong ba na ka liang ka seng hi ka shim ba ka long kaba shongnia halor ka jingdawa jong ka VPP ba dei ban pynkylla noh ïa ka Reservation Policy da kaba ai bhah katkum ka jingdon paid bad kumjuh ruh ha kaba ïadei bad ka jingdawa jong ki ban pynsahngeh shuwa katba ym pat lah ban wanrah ïa ka policy kaba biang.
“Na ka liang ka seng ka pynrem jur ïa ka jingkynthoh ka Achik Conscious Holistically Integrated Krima (ACHIK) kaba la kynnoh pyrshah ïa ka VPP bad ïa u Bah Ardent halor ka mat ba ki la kren ha assembly ha kaba ïadei bad ka Reservation Policy bad ka Reservation Policy bad na ka liang jong ngi ngin don bad ka VPP ha kaba ïadei bad kane ka jingdawa jong ki,” u la ong.
“Ngi la dei kiba kham heh paid shibun shah ban ïa ki Garo hynrei ha ka bhah kam bha jam ka wan pynban da ka juh ka jingïohbhah bad ki Garo kiba duna paid ban ïa ngi na ka liang jong ngi ka seng ngi sngewdei ba dei ban ai bhah kat kum ka jingdon briew bad ngi ïohi shuh shuh da ka jingwan ka Roster ngi la nang shah knieh shah knieh ka hok jong ngi bad ki Garo pat ki la nang ïoh jingmyntoi,” u la bynrap.
U la ong ba lada ka sorkar kam lah ban pynbeit thymmai ïa ka Roster system bad ka Reservation Policy na ka liang ka seng kam banse ban pynjur noh ïa ka jingdawa Khasi State khnang ba ka bhah ba dei hok yn ym don shuh ba lah ban knieh.
U la ong ruh ba ka jingaidaw ba ym lah ban leh eiei ïa kane ka mat namar ka dei ka hukum ka High Court jingkren ban thet kti ïa lade.
Shuh shuh u la ong ba na ka liang ka seng ka pynpaw ïa ka jingpyrshah halor ka jingdon ki karkhana coke be-aiñ ha ki katto katne ki bynta ka jaka.
“Hadien ba ka NGT ka la khang tih dewïong ha ka jylla ngi ïohi ïa ka jingktah ïa ka kamai kajih ki paidbah hynrei mynta ba ym pat pynlait ruh ngi ïohi ïa ka jingkharoi ki karkhana thangrnga coke bad ngi kwah ban buh jingkylli kine ki karkhana coke naei ki ïoh dewïong lada ym dei ba tih be-aiñ ïa u dewïong,” u la ong.
U Bah Charilie u la ong ba na ka liang ka seng kan sa leit ban ai dorkhas sha u Myntri Rangbah ka jylla ha kaba ïadei bad kane ka jingkharoi ki karkhana coke be-aiñ.
Shuh shuh u la ong ruh ba na ka liang ka seng ka la rai ban buddien ha kaba ïadei bad ka jingud ki paidbah ha kaba ïadei bad ka jingdon ki parmaw be-aiñ ha ki thaiñ Jirang kaba la pynjot ïa ka mariang.
“Na ka liang ka seng lyngba u Environtment Secretary un sa leit ban buddien ïa kane ka kam bad ka ophis u Deputy Commissioner bad ruh ban ai jingthoh ba ym dei ban ailad ïa kino kino ki jingtih maw ne shyiap khlem da ïoh jingbit na ka District Council bad ki bor ba dei peit bad ngin buddien ïa kane ka kam ruh shaduh ka NGT ban ai jingthoh ha kaba ïadei bad kane,” u la ong.
Shuh shuh u la ong ba ka seng ka la rai ban buddien ïa ka pule puthi khamtam eh ha kaba ïadei bad ka jingdon ki skul shimet kiba shim kabu ha kaba ïadei bad ka bai skul kaba ki shim na ki khynnah pule bad kumjuh ruh ha kaba ïadei bad ki skul sorkar pdeng ba kin bhah kyrpang ïa ki khynnah kiba wan na ka ïing baduk katkum ki kyndon ka Right to Eduction.

Leave A Reply

Your email address will not be published.