Shillong, Iaiong 01: U Bah Andrew Shullai, MDC jong ka JHADC uba long ruh u CEM barim, u la ong ba kawei na ki jingeh jong ki Autonomous District Council (ADC) kadei namar ba kim don ïa ka aiñ ba khang pyrshah ban kyntiap seng.
U Bah Shullai u ong ïa kane ha kaba ai ïa ka jingkren ba kongsan ha ka seminar ba la pynlong da ka Assam University, Silchar lyngba ka Political Science Department. Kane ka Seminar kadei halor ka subject, “Institutions, Politics and Political Processes in Fifth and Sixth Schedule Regions of India”.
U Bah Shullai u la ong ruh ba kawei pat ka jingeh jong ki ADC kadei ka jingïatyngkhuh ki aiñ jong ki District Council bad ki aiñ jong ka sorkar jylla lane ka jingshah jop ki aiñ jong ki ki District Council ha ki aiñ jong ka sorkar. U la ong ba ka jingkhlaiñ ki District Council kan shong ruh ha ka sorkar jylla namar ka Para 12 jong ka Sixh Schedule naduh ba sdang ka la long ka kyndon kaba la don ka jingïatai ka jingïakren ha kiba bun ki bynta. U la khot la wer ïa ki riewshemphang ha ki University ba kin ngam jylliew bad tih kham bniah shuh shuh halor ka Sixth Schedule khnang ba kan lah ban ai jingshai ïa ki paidbah.
Ïa kane ka Seminar la plie da u Vice Chancellor ka Assam University, uba long u kongsan ha kaba u la ai ka jingbatai halor ka jingtreikam ki bor treikam kiba don ha ki bynta kiba don ka jingïadei bad ki paidbah ha ki bynta kiba kham shapoh.
