Kyrshan ki Garo na ri Khasi ïa ka jingpyrshah ka Achik ban pynsangeh ïa ka Roster System

0

Shillong, Iaiong 01: Ka All Khasi Hills A.chik Federation (AKHAF) ka la ai jingkyrshan ïa ka jingpyrshah jong ka A’chik Conscious Holistic Integrated Krima (ACHIK) kaba la ieng pyrshah ïa ka jingdawa jong u President ka Voice of the Poeple Party (VPP) u Bah Ardent Miller Basïamoit uba long ruh u MLA jong ka Nongkrem Constituency ban pynsangeh shwa ïa ka Roster System katba ym pat lah ban pynbeit ïa ka Reservation Policy.
“Ngi kyrshan pura ïa ka A’chik Conscious Holistic Integrated Krima (ACHIK) kaba ai jingkyrshan ïa ka jaidbynriew (Garo) halor kane ka kam bad kaei kaba ki kren ka long kaba dei bad ka AKHAF kan ïai don lang ryngkat ryngkat bad ki,”ong u kyrwoh ba la soi da u President ka AKHAF u Cliverstar Marak bad u General Secretary u Manuel Marak ïa kaba la phah sha ki lad pathai khubor ha ka sngi Thohdieng.
“Ka All Khasi Hills A.chik Federation ka pyrshah jur ïa ka jingdawa jong u President ka VPP u Bah Ardent M. Basaïamoit halor ka Roster System bad ka jingpynrung ïa ka ktien Garo ha ka Khyrnit Baphra,” la pynpaw ki nongïalam ka AKHAF.
“Kane ka jingleh jong u President (ka VPP) ka dei ka jingpyrshang ban pyndam noh ïa ka Roster System ïa kaba dei ban pynrem namarba u la tynjuh ïa ka hukum ba la pynmih da ka Ïingbishar Meghalaya High Court, ka rai ba la pynmih da ka Ïingbishar badonburom ka dei kaba laitluid bad kaba bishar sani bha bad ka bym don bynta eiei bad ka Ingdorbar Thawaiñ bad ka Sorkar,” la ong ka AKHAF.
“Ka jingñiew beiñ ïa ka aiñ ym tangba ka long kaba be-aiñ bad ka dei ruh ka jingpyrshang ban wanrah ïa ka jingïapher jaidbynriew bad ka jingïa-isih hapdeng ki nongshong shnong jong ka Meghalaya da kaba pynïapher ïa ka Reservation Policy ïa kaba la pynmih Ïingbishar. Ki Garo kiba im ba sah ha rilum Khasi ki don kumba 5-8% kynthup ruh ïa kiwei kiwei ki jaidbynriew, kum ki Hajong bad ki Banai. Ban shu leh bym suidñiew ïa ki hok jong ngi ka dei ka jingpynrem bad dei ban pynneh kumba ka long bad yn ym ailad satia ïa kano kano ka jingpyrshang ban pynjngut lane ban shim kabu,” ong shuh shuh u kyrwoh.
“Kawei pat ka jingkren kaba pynmih ïa ka jingsngew ïapher da u RP Kharshiing ha kaba ïadei bad ka kyntait ban pynrung ïa ka ktien Garo ha ka Khyrnit Baphra la pynrem jur bad ka AKHAF ka maham ïa kino kino kiba kdew kti halor ka ktien Garo,” la bynrap u kyrwoh.
“Ma ngi ki Garo kum kawei ka jaidbynriew ngi don lut ïa ki jingthoh jingtar halor ka ktien bad kiwei kiwei ki jingdonkam na ka bynta ban ïoh ïa ka jingithuh jong ka Sorkar bad ban pynrung hapoh ka Khyrnit Baphra. Ngi kwah ban pynpaw naduh ba la ïoh ïa ka Jylla Meghalaya, ki Garo bad ki Khasi ki la ïakhun ban pynrung ïa ktien hapoh ka Khyrnit Baphra. Katba, ka jingkren kaba mih kum na u riewshimet ban ym pynrung ïa ka ktien Garo ka long kaba sngewsih bad ka long kum ka jingshet kylla ïa ki Garo. Ngi pynrem jur ïa kane ka jingkren,” la kynthoh ka AKHAF.

Leave A Reply

Your email address will not be published.