‘Ngi donkam shisha ban jop’: pynpaw u Bheke shuwa ki ar tylli ki jingïalehkai bar ri jong ka India

Shillong, Lber 17: Ka kynhun ïalehkai phutbol jong ka ri India ka la ïoh ban pynlong 2 tylli ki prokram kilanmet lane ka training sessions ha Shillong bad ki don mynta ha ka jingpynkhreh ïa ka AFC Asian Cup Qualifier pyrshah ïa ka Bangladesh (ha ka 25 tarik Lber) shuwa kane, kan don ka jingïalehkai paralok pyrshah ïa ka Maldives (ha ka 19 tarik Lber). U Rahul Bheke, rangïalehkai ba shadien u la ong da kaba skhem ba kano kano kaba duna ïa ka jingjop ha ki ar tylli ki jingïalehkai kan long ka jingduhnong ïa ka kynhun.
U Bheke, uba la ïakhun pyrshah ïa ka Maldives shisien bad ka Bangladesh arsien mynshwa (baroh ha u snem 2021), u sngew ba kine kine ki kynhun ki la mad shibun ki jingkylla ha kine ki saw snem.
“Nga la ïalehkai pyrshah bad baroh ar tylli ki kynhun, hynrei la katto katne snem naduh ba Ngi la ïakynduh khatduh ïa ki. Nga la ïohi ïa ka burkom lehkai jong ki ha ki jingïalehkai ba dang shen. Baroh ar ki dei ki kynhun kiba tbit kiba thmu ban rung sha ka Asian Cup. Te, Ngi donkam ban leh ïa kaba bha. Kine kidei ki ar tylli ki jingïalehkai hala ïing ba Ngi donkam ban jop.”
Ka kynhun ïalehkai kaba kynthup ïa ki 22 ngut jong ka Maldives ki la wanpoi ha ka nongbah Meghalaya ha ka Sngi U Blei bad kan ïoh ïa ka prokram jingkilan met ar sngi shuwa ban ïakhun pyrshah ïa ka India.
U Bheke, uba la pynkhihjar na bynta ka India ha ka jingïalehkai ba khatduh pyrshah ïa ka Malaysia ha u Naiwieng, u la ong, “Ngi la sdang bha ïa ka camp, da ki ar tylli ki prokram kilanmet ba pusa. Ngi dang don sa ar tylli ki sngi shuwa ka jingïalehkai paralok, bad kane ka long ka jingpynkhreh kaba khraw na bynta ka jingïalehkai ha ka 25 tarik (pyrshah ïa ka Bangladesh). Nga tharai ba ka Maldives kan long ka jingtynjuh kaba bha namar ba ka dei ka kynhun kaba ïadei dur bad kaei kaba ka Bangladesh kan long.”
Hadien ba u la ïalehkai la bunsien ha Shillong ha ka por ba mih madan na ki klob, une u rangïalehkai ba 34 snem ka rta, u la pynpaw ïa ka jingkmen ban mihkhmat ïa ka ri hangne bad u kyrmen ruh ba ka Jawaharlal Nehru kan long kaba shongshit na ka bynta kine ki ar tylli ki jingïakhun.
“Nga la ïalehkai ha Shillong mynshwa, ha ka por jong ka I-League, bad dang shen Nga la wan hangne bad ka Bengaluru FC ban ïakhun pyrshah ïa ka NorthEast United. Ka suiñbneng ka long kaba khriat ha katei ka por, hynrei mynta ka long kaba sngewtynnad na bynta ka phutbol. Baroh ki sngewtynnat ban kilanmet ha madan hangne. Ngi tip ba ka suiñbneng kan long kaba bha bad ka jingkyrshan kan long kaba jam.
“Ngi la shem ïa kane ha ka ISL. Ka stadium ka la dap mam. Ngi kyrmen ba katjuh ki briew, lada ym palat, kin don lang ha ki por ba don ki jingialehkai jong ka India,” la ong utei u rangïalehkai ba shadien jong ka ri.
La tip ba u Bheke u dei u rangïalehkai uba lah ruh ban tur shakhmat, kaba la pynlong ïa ka kyrteng jong u kum u wei naki rangïalehkai ba shadien ba lah ban thep kol. U la pyni ia ka jinglah jong u da kaba thep lai tylli ki kol na ka bynta ka Bengaluru ha ka ISL 2024-25. Ka kol pynjop jong u ha ka Extra-time na ka bynta ka Bengaluru ha ka jingïakhun final jong ka samoi 2018-19 pyrshah ïa ka FC Goa ka la long kawei na ki kol ba sah kynmaw ha ka jingim jong u kum u rangïalehkai. U la thep ruh ar tylli ki kol na ka bynta ka India.
U la pynpaw ruh ba uba pynkhlaiñ shuh shuh ïa ka India dei u Sunil Chhetri, uba u Bheke u mih madan ryngkat bad ka Bengaluru FC. Hynrei wat ma u ruh um shym la don jingtip lypa shaphang ka jingwanphai biang jong u Chhetri sha ka kynhun ïalehkai jong ka ri.
“Ngam shym la tip shisha ba un wan biang sha ka kynhun ialehkai ka ri. U la ïathuh ïa Ngi ïa ka rai jong u ha ka por training jong ka BFC ha kajuh ka sngi ba la pynbna ïa ka jingwanphai jong u. Nga tharai ba ka long kaba khraw ia ka kynhun namar ha kane ka por, u dei u snar thep kol ba kynsai jong ka India ha ka league. Kan long kaba bha ban kynthuplang ïa u ha ka kynhun. Baroh Ngi tip ba u lah ban wanrah eiei, ym tang ha madan hynrei shabar madan ruh da ka jinglong nongialam jong u,” la pynpaw u Bheke.