SHILLONG, Lber 17: Ka kynhun ïalehkai kriket jong ka Young Guns CC ka la ïoh ban rah ïa ka nam lahduh ha ka lympung kriket kaba la tip da ka ‘Shillong Cricket League First Division 2024-25 ba la pynlong da ka Shillong Cricket Association [SCA] ha madan Polo.
Ka Young Guns ka la pynthikna ban rah ïa katei ka nam dei hadien ba ka la jop salit da 13 ron ïa ka Nongthymmai SCC ha ka jingïakhun ïa ka final kaba la long ha ka sngi Nyngkong.
Ka jingkynting pisa (toss) ka la leit sha ka Nongthymmai bad kane ka kynhun ka la aiti ïa ka Young Guns ba kan tied nyngkong, kaba la lah ban kamai 159 ron shuwa ban khyllem baroh 10 wiket haki 37.4 ober.
U Raja Khongwir u la lamkhmat ha ka tied da kaba kamai 35 ron naki 51 bol, katba u Rudra Singh u la kamai 26 ron naki 49 bol. Kiba la seisoh ha ka tied ki long u Gaurav Nerlang da kaba khur 3/21 naki 5 ober, nangta u Ram Nijjar u la khur 1/17 naki 8 ober.
Haba pyrshang jubab ka Nongthymmai ka la ïakhun tyngeh hynrei ka la shah pynkhyllem baroh 10 wiket tang na bynta 146 ron haki 38.2 ober, kaba pynlong ïa ka kynhun ban sahdien da tang 13 ron. Watla katta ruh, na ka liang jong u Banialam Mylliemngap u la kamai 44 ron naki 65 bol, katba u Ashish Lohar u la kamai 28 ron naki 40 bol.
Kiba la seisoh ha ka bol na bynta ka Young Guns ki long u Mewankitbok Kharpuri, uba la khur 2/25 naki 8 ober, bad u Angkit Tamang uba la khur 2/28 naki 7.2 ober. namar ka jingtrei shitom jong u ha kane ka jingïalehkai, u Angkit Tamang (15 ron ha ka tied bad khur 2 wiket ha ka bowling) u la ïoh khur ïa ka khusnam Player of The Match.
