SOHRA, Lber 17: Ka sngi ba hynñiew (Day:7) jong ka lympung Inter Office Cum Corporate League T20 Cricket Tournament 2025, ba la pynïaid da ka East Khasi Hills Cricket Association [EKHCA] hynne ka sni Nyngkong ha Sohra, la sakhi ïa ka Ribhoi Office Combine kaba la pynliem da 7 wiket ïa ka Sohra Post Office.
Namar ka jingpynthut u slap la pynduna ïa ka jingïalehkai sha ka 15 ober. Hadien ba jop ïa ka jingkynting pisa (toss) ka Sohra Post Office ka la rai ban tied nyngkong, hynrei ka la ïohlad ban kamai duna ka ron, kata da tang 94/5 haduh kaba kut jong ki 15 ober. U Michael Roy Shongdiar u la long uba kongsan ha ka tied da kaba kamai 32 ron naki 36 bol. U Pankaj Roy u la khur 3/9 naki 3 ober.
Haba wanphai ban tied, ka RiBhoi Office Combine ka la pyndep ïa ka kamram tang ha ki 6.5 ober ban kynjoh 96/2 bad ban jop ïa ka jingïalehkai da 7 wiket. U Rejiedstar Marbaniang u la long uba kongsan tam ha ka tied da kaba kamai 42 ron naki 18 bol, hynrei ïa ka nam Player of the Match la khur da u Pankaj Roy.
