Ngi dang ap ïa ka jubab na ka HPC ban pynkynriah na Them ïew Mawlong, ong u Bah Sniawbhalang

By Mawphor News Desk On Oct 27, 2022

Shillong, Risaw 26 : U Myntri ka tnad pynroi sor (Urban Affairs) u ma Sniawbhalang Dhar u la ong mynta ka sngi ba ka sorkar ka dang ap ïa ka jubab na ka Harijan Panchayat Committee (HPC) halor ka Blueprint ba ka sorkar ka la aiti sha ki na ka bynta ban shna ïa ki ïing paki dulan ban pynkynriah ïa ki 342 tylli ki long ïing na Them Iew Mawlong.
“ Ka ïing bishar High Court (HC) dang shen ka la hukum ïa ka HPC ba kin ai jubab kloi halor ka jingtyrwa jongka sorkar jylla sha ki. Kumta mynta ngi shu ap beit lano kin ai jubab bad ban wan ïakren halor ka blueprint ba la aiti sha ki” ong u ma Sniawbha.
“ Ha kano kano ka por ba ki kloi ban wan ka sorkar kan sa khot beit ïa ki” ong biang u Myntri.
Ha ka 21 tarik Risaw 2022 ka ïing bishar High Court ka la bthah ïa ka HPC ba ka dei ban jubab hapoh shibnai ïa ka jingtyrwa ne ka blueprint ba ka sorkar ka la ai sha ki. Namar ïa ka blueprint la dep aiti sha ki naduh ka 30 tarik Nailur 2022.
Namar ba ka HPC ka pyntip ba ka dang bishar bniah ïa kane ka jingtyrwa bad ka blueprint, kumta ka ïing bishar ka la ai por ïaki ban jubab hapoh saw taiew bad hadien kata kan sa shong bishar biang halor kane ka mukotduma.
Ka ïing bishar kan shong bishar biang ha ka 16 tarik Rymphang 2023.
Ka sorkar ka la aiti ïa ka blueprint sha ka HPC naduh ka 29 tarik Nailur 2022 ha ka jingïakynduh ha Secretariat. Ha katei ka blueprint la pynpaw ban tei da ki ïing bun mala ban pynsah ïa ki Harijan ha ki Quarter jong ka Shillong Municipal Board.
Ka sorkar kala kyntait war ïa ak jingdawa ka HPC ban ai mar 200 sq.meters ka jaka bad ban pynshna ïing ruh ïa ki 342 ki long ïing bad ka jaka ka dei ban long hapoh ka European Ward.Hadien ka jingïalang u Secretary ka HPC u Gurjit Singh ula pynpaw ka jingsngew diaw halor ka jingkynait jongka sorkar ïa ki jingdawa jongki.
Dei na kane ka daw ba ka sorkar ka la thaw ïa kane ka blueprint ban tei da ki ïing bun mala ban pynsah ïa kitei ki 342 ki long ïing kiba yn pynkynriah na Them ïew Mawlong.