Shillong, Risaw, 26: U State President jogn ka Nationalist Congress Party u Saleng A. Sangma uba long ruh u MLA jong ka Gambegre ha ka sngi Balang u la kynthah tyngeh ïa ka jingkren jong u Myntri ka Sorkar Pdeng u Kiren Rijiju.
Dang shen u Rijuju ha ka jingwan iuhkjat jong u ha nongbah Shillong u la ong ba ka Meghalaya ka dei hok ban ïoh kham bun ki MLA na ka BJP khnang ba kan khlaiñ ka jingdawa ha kaba ïadei bad ka jingdawa jong ki paidbah nongshong shnong ka jylla, haba jubab ïa ka jingkylli halor ka jingpynslem jong ka Sorkar Pdeng ban pyntreikam ïa ka Inner Line Permit (ILP) ha ka jylla.
“Ka dei tang ka jingkren bym shongnia jong u Kiren Rijiju namarba lada ki sngew khia ïa ki paidbah ka jylla Meghalaya kim dei ban ong ba tad ynda ngi ïoh thaw ïa ka Sorkar ngin sa pynurlong ïa ka jingdawa,” ong u Saleng.
“Ka long ka bym shongnia ban kren kumne. Ha ka jingshisha lada ki pyrkhat ïa ki paidbah ka jylla Meghalaya ki la dei ban ai ïa ka jingdawa lada ym don makna ka BJP ha kane kajylla ruh,” u la bynrap.
U la pynkynmaw ruh ba ki arngut ki MLA ka BJP ki la ïoh ïa ka kyrdan Myntri bad ong, “nalor kata, ki dang ïatreilang hapoh ka Sorkar MDA haduh mynta ruh.”
U Rijiju u la ong ba u kwah ba ka BJP kan kham ïoh jaka hapoh ka Sorkar watla ki paidbah jong ka jylla Meghalaya ki la pynkup bor ha ka Sorkar MDA ba la ïalam da ka National People’s Party (NPP) kaba la trei la ka jong ka kamram.
“Nga la ïohi haba ka BJP ka don ha ka bor lane ka BJP ka kham don bor ha ka sorkar, ki song pynroi ki kam tuid bha sha ki paidbah namar ngi don tang kawei ka thong ban shakri ïa ki paidbah. Ngi don da ka thong ban trei, ngim don por, lymne ka bor na ka bynta jong ngi, ngi aiti lut nadong shadong na ka bynta ka bit ka biang jong u paidbah,” ong u Rijiju.
