Shillong, Jylliew 29: Kawei ka longkmie kaba kyrteng ka Kong Canra Lyngdoh na Nongmynsong ka la shu ngat ei ha ka Criminal Case hadien ba ka la shah thok ha kawei ka kompeni kaba kyrteng ka Look Culture Limited kaba na ri America kaba la trei ha kane ka kompeni kum ka Group Assistant.
Kane ka longkmie kaba dei ruh kaba khlem kam khlem jam ka la shah pynngop ha katei ka kompeni. Haba ïathuh naduh ba ka la mad ïa kane ka jingeh sha ki lad pathai khubor ka la ong, “Nalor ba u kurim jong nga u la khlad nga la sdang ban plie ïa ka dukan bad hadien ba la duhnoh ïa ka dukan ka la wan ka jingeh bad ngan leh kumno halor naba ngam pat lah ban trei ïa kano kano ka kam bad nga la pyrshang bun ki kam ngam ïoh namar ba la palat ka rta bad nga la sdang ban wad kam lyngba ka rynsan online bad nga la ïakynduh ïa ka Manager kaba kyrteng ka Anabella ha kaba ka la kylli ïa ka jait ka kyrteng bad ka la ïathuh shaphang kane ka kompeni.”
Ka la ïathuh ruh ba katei ka Manager ka la kyntu ïa ka ban trei noh bad katei ka kompeni ha kaba kane ka aikam kiba khlem kam, bad kane ka kompeni ka ai jingïarap ïa kiba duk bad ka la ïathuh ruh ba lada lah ban treibha ha kane ka jaka ki khun ki kti kin imbha bad kin suk.
“Kumta nga la sdang ban ïakynduh ïa ka bad nga la shaniah bha bad nga la sdang ïa ka kam ha ka 31 tarik u Risaw 24 mynshem snem bad ka la ong ban hap siew T. 2250 bad ki plan ki long ba hadien ba la sdang ïa ka kam yn ïoh T. 75 shisngi bad yn da la sdang ïa ka kam da ka T. 75 tyngka shisngi bad phin lah ban trei ha ka group kaba kan ai ma ka bad ngan hikai ïaphi hapoh ki 7 sngi bad ka la kular ruh ban ïohlang bad ka tulop bad hadien ba ka la dep hikai kaba la buh ïa nga hapoh ka working Group Assistant bad ha kane ka kynhun nga trei naduh ka por 9.30 mynstep haduh ka por 10.30 mynmied,” ïathuh ka Kong Lyngdoh.
Ka la bynrap ruh da kaba ong, “Naduh u Naiwieng haduh u Nohprah nga la trei shitom ha kane ka group nga ïoh ka kyrdan Goup Assistant bad nga la kmen bha ba nga ïoh ïa kane ka syrnot bad ka la ong ba ngan ïoh ïa kane ka syrnot ha u bnai ban wan ba ka tulop kan long T. 6500 bad ryngkat bad ka pisa 75 tyngka manla ka sngi bad nga la kmen bad shaniah bad nga la ïaid shakhmat.”
Ka la ïathuh ruh ba hadien kane, watla kam pat shaniah bha ka la leit pat sa sha kiwei ki briew ba ka ithuh kiba don jingïadei ban pyni ïa kine ki syrnot ba ki la peit ki la ïathuh ba kane ka kompeni kam don scam kam don eiei hynrei tang lada ka validity ka la kut kamut kam treikam shuh bad ïa ki briew kiba ka invite ruh ka pyni ïa kine ki syrnot, ka leit ruh ban ai jingïarap ïa ka Batesi TV, nangta ïa ki ïing baduk ha Nongmensong bad dei halor kane ka la trei shitom bad ka la invite ïa ki briew bad ha kato ka por ka dang dei T. 2250 ka bai rung.
“Hadien ki pynkiew ïa ka pisa jong nga sha ka T. 6700 kaba nga la ïoh T. 200 shi sngi bad nga la kiew sha ka kyrdan Internship Assistant bad hangne nga ïoh tulop T. 11000 bad nga la trei shitom na ka bynta ki briew jong nga bad ki la pynkiew kyrdan kum ka Juniour Assistant bad nga dei ban ïoh tulop T. 35 hajar ki la credit ïa ka tulop hynrei nga khlem ïoh bad ka kompeni ka khang noh bad ka por trei hangne ka kyrdan ka dei naduh 9.30 mynstep haduh 12 baje mynmiet. Ha kane ka kyrdan ka Manager ka la ong ban leit ïarap ïa ki kynhun katba ki don jingeh ki bym nang ban leh intall ïa ki apps, ki don kiba don ki iPhone, Samsung phone, kumta nga leit ban ïarap katba ki khot. Hadien kane ki briew ki la sdang ban bud bad nyngkong eh nga invite shwa ïa i para la jong nga bad kiwei bad ka la kiew bha bad don katto katne ki downline jong nga ki la ong ba ki la ïoh ïa ka nong kaba heh bad ki la pynpaw ka jingsngewnguh ïa ka kompeni, hynrei haba ka la duh mynta ki ong ba kam dei ka jingbakla jong phi, hynrei dei ka jingleh ka kompeni khamtam haba ki tip ba nga ngat ha ka criminal case mynta. Ki don ruh kiba sngewthuh hynrei ki don ruh ki bym sngewthuh, khamtam kito kiba wan na ki longïing baduk,” ïathuh i kong Lyngdoh.
Kaei kaba kham kynsha bha ka long ba kane ka kompeni ka la pynmih ïa ka offer kaba heh bha ha ka Look Job Fair kaba long kum ka fixed deposit kaba 20%, 25% haba bun bha ki briew ki la ngop bha, kaba ma ka ruh kadei kawei kaba la ngop. “Ki kynhun jong nga ki la bun bha bad kine ruh ki la ngop ha kane ka jingtyrwa naba lada ki thep T. 1 lak kin ïoh T. 11 lak bad kane ka kompeni ruh ka la nangneh nangneh haba ka wan poi sha Shillong. “U General Manager u dei u Robert Scany uba na USA bad ka branch kane ka kompeni ka don ha Pune hynrei kane ka kompeni ka duh ha ka 26 tarik mynta u bnai bad ki jingsiew baroh nga la siew sha ka Annabela ka manager bad sha u General Manager,” ka la ong.
Ka la ïathuh ruh ba hadien ba ka la duh kane ka kompeni naba la tieng palat ka la leit sha ki pulit ban leit ai FIR ïa kane ka kompeni. “Ki la bun ki jingshah phone nga la ïohpdiang bad ngam nang shuh ban jubab tang ïano bad ki briew kiba la rung ha kane ka kompeni bad don kiba phone kiba nga lah ban jubab nga la leh bad ki don ruh kiba ngam lah shuh ban jubab nga la shu sngap beit bad mynta ïalade ruh ka jingim ka la don hapdeng ka jingma kaba khraw haba ki don ruh ki la wan wad bad ki don ruh kiba byrngem ban pynïap lada ngam lah ban siew dep ïa ka pisa jong ki,” ka la bynrap.
“Na ka liang ki pulit ki la ïathuh ba kin thwet ïa kito kiba donkti ha kane ka kam bad kiba leh kam bymman kiba la thok ïa ngi ki briew kiba duk ba jynjar ba mynta nga ruh nga dei lanot ha kane ka jingshah thok bad kumta nga kwah ban pynshai sha baroh ba nga ruh nga la shah shet lang bad ngam don pisa ban siew naba baroh ka pisa nga la ai lut sha ka kompeni bad ka tulop kaba nga dei ban ïoh ruh nga lah duh. Nga kyrpad ïa baroh ki downline jong nga ban mab ïa nga baroh, nga la bakla naba nga dang trei nyngkong ngam tip, kumta kyrshan bad ai jingujor FIR lang ïa kane ka kompeni khnang ban ïoh thwet mano ba dei u riew runar khnang ban ïoh ki sabut, ban ïoh noh ka pisa jong la jong bad ki bym pat ïoh ka pisa ki lah ban leit shapoh ka Police Cyber Crime ha IGP ban file complaint ban ïoh noh ka pisa bad ba kin kyrshan pat ïa nga naba nga ruh nga dei ka Lanot bad ngat ha ka Criminal Case kaba ngam ju poi pyrkhat ha ka jingim ka jong nga ba ngan ngat ha kane ka apot, nga pdiang ba nga la bakla bad kane ka dei ka jingsneng bad nga kyrpad ïa kiwei kiba kwah ban trei ha ki kompeni peitbha bad lada kim register hapoh ka Civil Cyber Crime,” ka la kyrpad.
“Nga kyrpad ïa kito ki downline jong nga ban sngewbha wad nym wan ha ïing jong nga naba kane ka la ïaid police case bad lada phi ktah ïa ka ïing ka sem jong nga phin ngat ei ha ka kti jong ka aiñ,”
