Ngan ujor sha ka Sorkar Pdeng bym biang ka jingpyntrei ïa ka skim JJM ha East Jaiñtia Hills : Lektor Dkhar

Khliehriat, ïaïong, 19: U samla Lektor Dkhar na ka shnong Khliehmyntriang, East Jaiñtia Hills District u la pynpaw ka jingsngewkhia halor ka jingbym biang ka rukom pyntrei ïa ka skim sam umbam umdih hapoh ka Jal Jevan Mission (JJM) ha East Jaiñtia Hills District hadien ka jingioh pdiang ïa ki jubab RTI na ka ophis u Executive Engineer ka tnat PHE, Khimusniang, West Jaiñtia Hills.
Ka skhim JJM ka dei skim sam umbam umdih ba la pynbna paidbah da u Myntri Rangbahduh ka ri u Narendra Modi naduh u snem 2019 bad halor ka jingbym biang ka jingpyntrei ïa ka skim JJM u samla Dkhar u samla u la ong ba un sa ujor wat shaduh ka Sorkar Pdeng.
U la ong, lyngba ka jubab RTI ba la ioh na ka ophis u EE PHE, West Jaiñtia Hills ki don haduh 108 ngut ki Contractor kiba pyntrei ïa ka skim JJM ha East Jaiñtia Hills District bad ki don tang 5093 hajar tylli ki longïing kiba dang ioh ïa ka um na ka skim JJM. Kane ka dei kaba la pynlyngngoh haduh katta katta ïa u samla Lektor Dkhar.
U la iathuh ba ka tnat PHE kaba peit ïa kane ka skim ka la aidaw halor ka jingslem ban pyndep ïa ka kam namar ka jingwan lynshop ka jingpang khlam Covid-19 kaba la buh jingeh ïa ki Contractor ban pyntrei ïa ka kam. Kaba ar, la aidaw bad ong ba ka rukom bat khyndew ha Meghalaya ruh ka dei ka daw kaba pynslem ïa ka kam ha kaba ki don ki jaka ba donkam ban shna na ka bynta ka jingdonkam jong ka skim hynrei ki dei ki jaka jong ki riewshimet.
“Ki don lai tylli ki skim Multi Village kiba kynthup ïa ki 46 tylli ki shnong kiba pynlong ïa ki lai tylli ki tyllong um, ka jingbuh ïa ki pipe um ha ka skim JJM ha ki shnong ka la bam por shibun na ka daw ba hap ban ïakren bad ki trai jaka ban ioh ban shna ïa ki jingtei ban ioh pynpoi ïa ka um. Kawei pat la ai daw namar ka jingjur jong u slap bad jingshlei um ha u snem 2022-2023 bad ha u snem 2023-2024 ka la pynthut ïa ka jingpyntrei ïa ki kam. Ki don katto katne ki bynta jong ka skim kiba la shna pyndep ki la mad ïa ki jingjulor bad kane ka la pynslem ïa ka jingïaid ka kam. Kine ki long ki daw ba la ai bad pynpaw na ka liang ka tnat PHE ïa kiba ym lah ban pdiang namarba hapoh ki ar snem ngi la mad shisha ïa ka jingwan lynshop ka khlam jingpang Covid-19 kaba la pynthud ha ki kam ki jam. Hynrei ka daw kaba wanrah ïa ka jingshlei um na ka jingther jong u slap ha u snem 2023-2024, u slap un don beit, kan don jingmut aiu ba bun sa tang ki Contractor katba ka kam ym lah ban pyndep,” la kynthoh u samla Lektor Dkhar.
“Ka jingpyntrei ïa ki kam ha baroh ki shnong ki bym pat ioh ïa ka hok ban ioh ïa ka skim JJM ka dang ïaid shakhmat. Nga kwah ban buh ka jingkylli hangne, hangno kata ka shnong kaba dang ïaid shakhmat ha ka kam. Bun tylli ki shnong kiba dang dep buh tang ki pipe um katba ka um kam pat don. Bun ki pipe um ruh kiba ym don shuh, don kiba la sop sarang ruh hato kane ka long ka jingthmu jong ka tnat,” la buh jingkylli une u nongwad RTI.
“Hadien ka jingiohi jong ngi baroh ki paidbah ka East Jaiñtia Hills District ba kane ka skim JJM kaba la pynbna da u Myntri Rangbahduh ka ri ha u snem 2019 kum ki paidbah ngi iohi ba la pynpoi tang ïa ki pipe katba ka um kam pat poi bad ki dang bun ki shnong ki bym pat ioh ïa ka um. Dei halor kane ba nga la pan da ka RTI na u ophis jong u EE PHE, Khimusning Jowai ha ka 12 tarik, Lber, 2025,” u la ong.
“Halor kane ka kam ngan iaid shakhmat bad kum ki paidbah ngi dei ban ioh beit ïa kane ka skim kaba ngi dei ban ioh ka dei ka hok jong ki paidbah. Ka Sorkar Pdeng ruh ka dei ban ioh jingtip halor kane bad ngan sa ujor shaduh ka Sorkar Pdeng ruh,” la pynpaw u samla Lektor Dkhar bad bynrap, “ngan sa ujor sha ka tnat ba dei peit khnang ba ka Sorkar Pdeng kan tuklar lem ha kaba ïadei bad kane ka skim JJM ba ki paidbah ki don ka hok ban ioh namar hangne la shu ai daw halor ka jingslem ban pyndep ïa ka skim bad lada ngi pdiang ïa kita ki jingai daw ki bym shong nongrim ngin ym ioh hi ruh ïa ka hok kaba ngi dei ban ioh.”
U la kynthoh ruh ba ki Contractor kiba pyntrei ïa ka skim JJM ki don ruh kiba nabar ka jylla, kata, na Kolkata bad kiba na ka jylla Assam.