Ngan sa pynsngew sha ka Sorkar lada don ki kynhun lehnoh ha khappud Indo-Bangla: Margherita

Shillong, Rymphang, 22: U Myntri Khynnah ka Sorkar Pdeng uba khmih ïa ka External Affairs and Textiles u Pabitra Margherita u la ong ba un sa pynsngew sha ka tnat Kam Pohing ka Sorkar Pdeng halor ka jingïoh jingtip ba ki don ki dkhot seng lehnoh kiba pyrshang ban pynim biang ha khappud India-Bangladesh.
Haba ïakren bad ki lad pathai khubor, u Margherita u la ong lada ki don shisha kum kita ki jingtip, un sa pynsngew sha ka tnat Kam Pohïing.
“Ngin pynthikna ba ki bor pahara jong ngi, ka jingshngaiñ kan dei ka mat kaba hakhmat eh jong ka ri jong ngi,” ong u Margherita.
Ha kaba ïadei bad ka jingdawa ban buh ïa ka Passport Office ha Tura, West Garo Hills, u Myntri Khynnah ka Sorkar Pdeng u la ong ba haduh mynta ka tnat kam pat ïoh satia ïa kano kano ka jingkyrpad na ka Sorkar Jylla ha kaba ïadei bad kane ka mat.
“Lada kum kata ka jingkyrpad ka wan na ka Sorkar Jylla, khlempep ka Ministry kan sa ïakren ïa kane. Ka Ministry ka la trei shitom ban pyiar ïa ki jingshakri sha baroh ki kyndong kynshrot bad sha ki jaka ba kyndong tam ha ka ri jong ngi. Khlempep, lada kum kata ka jingtyrwa ka wan na ka Sorkar Jylla ne na kino kino ki kynhun, ngin sa ïakren bad ngin long kiba kmen eh ban don kum kata,” u la ong.