Ngan ïai ïatrei lang bad ki paidbah ban pyndep ïa ki kam ba sahteng ha Mawkynrew Constituency: Banteidor

Shillong, 15 Lber : U Bah Banteidor Lyngdoh, hadien ka jingjop biang jong u ïa ka elekshon MLA dang shen na Mawkynrew Constituency, u la ong ba un nym ïapeiñ ïa ka jingshaniah kiba ki paidbah ka Constituency ki la ai bad kumba u la leh ha ki san snem ba la dep nangne sha khmat ruh un shim ka jingïatreilang ban pyndep ïa ki kam kiba sahteng bad ban kyntiew ïa ka Constituency.
Haba kren ha ka jingïalang kaba la pynlong ha ka 15 tarik u Lber, 2023 ha Thangsning ban ai khublei ïa ki nongkitkam bad nongkyrshan namar ka jingjop ïa ka elekshon MLA myn ha ka 2 tarik u Lber, 2023, u Bah Banteidor u la ong ba ka Constituency ka dang donkam shibun ki kam ban kyntiew ïa ka roi ka par.
Da kaba pan jingïatreilang na ki paidbah, u la ong, “Ha ki por elekshon ngi kaweh la ki jong ki lama hynrei ynda la dep pat dei ban klet noh bad pynjah ïa ki jingsngew pher party namar ka kam elekshon kam dei ban khanglad pat ban ïa mih ïa rung shi ïng shi sem hynrei ngi donkam ka jingïatreilang ban kyntiew ïa ka thaiñ”.
“Ka kam saiñ-hima kam dei ban neh baroh san snem ha ka Constituency bad mynta ngin ïatreilang khlem da sngap ïa ki jingkynnoh ne jingkynthoh jongno jongno ruh”, u la ong da kaba bynrap ba ki 11,789 vote kiba u la ïoh ha ka elekshon ba dang shen ka dei lyngba ka jingieid bad jingshaniah ki paidbah bad nangne sha khmat pat ban ïatreilang da ka jingshaniah ïa u bad ki nongïalam na ka bynta ki skhim MLA.
Haba phai sha ka jingïaid lynti sha elekshon, u la ong ba u khlem lah ban leit mih ha man ki shnong hynrei tang lai tylli ki jingïalang paidbah kiba heh ki la pynkut ïa kiba ïaleh pyrshah. Halor ka elekshon MDC pat u la ong ba ïa mynta yn nym pat ïakren eiei bad ki nongïalam ka Party bad ma u hi kin dang shong pyrkhat bad ïa mynta yn pyrkhat shwa ïa ki kam ki jam.
Ha kane ka sngi, ki nongkyrshan ki la aiti da ka jingai buh sah jingkynmaw ïa u Bah Banteidor ha ka jingsakhi lang ki nongkitkam ka PDF Zonal Committee Mawkynrew Constituency, PDF Central Executive Committee nalor kiwei pat ba kynthup ïa ka Dr Amanda A Pakynteiñ, kurim u Bah Banteidor.
La pynshong shit ïa kane ka sngi da ki jingrwai jingshad da ki samla ka thaiñ bad la sam ruh ïa ki khusnam sha ki nongjop jong ka lympung ïalehkai phutbol Mawkynrew Cup mynta u snem.