Shillong, Lber 15 : Ka jingrung krem ba 31 hapoh ka jylla kaba la tip kum ka “Caving in the Abode of the Clouds” kaba la wan ban ïashim bynta da ki nongrung krem na kylleng ki ri ka pyrthei hapoh ka jingïalam ka Meghalaya Adventure Association (MAA) kaba la sdang naduh ka 6 tarik u Rymphang 2023 ka la kut ha ka 24 tarik Rymphang 2023.
Ka jingrung krem mynta u snem ka long ha ki thaiñ Muallian, East Jaintia Hills District. Kiba la wan ïashim bynta ki dei na UK, Switzerland, Ireland bad ki dkhot ka MAA.
Ka jingrung krem mynta u snem ka long ha Krem Rynjang (Retdung Khur), Pynnoh Um Sngad bad Ram Khur.
Ha ka jingrung ha ka krem Pynnoh Um Sngad la bteng na kaba la rung ha u snem ba la dep na ka 5,395m sha ka 7,83 m bad ka la pynïasoh bad ka Ram Khur.Da kane ka jingpynïasoh ka krem Pynnoh Umsngad -Ram Khur ka jingjrong ka la poi sha ka 14,951 metres bad ka la wan mynta ha ka kyrdan ba 7 ha ri India napdeng ki krem ba jrong tam.Ki dang bun ki lad ki lynti hapoh kane ka krem kiba ym pat lah ban dep rung bad thew.
ïa ka Krem Rynjang la lah ban rung haduh 4,117m bad mynta ka jingjrong jongka ka long 20,445m bad ka la wan ha ka kyrdan kaba san napdeng ki krem ba jrong hapoh India. ïa kane ka krem ruh ym pat dep rung lut.
Ka jingrung krem mynta u snem ka kham eh bad jwat bha namar baroh ki krem ki dei kiba hap beit ban hiar arsut ha ka jingjylliew kaba 85 m shaduh trai. Ka shim por ruh haduh 3.5 kynta ban poi sha ka jaka ban rung bad thew ïa ki krem. Mynta u snem ka jingrung krem la lah ban pyndep bad thew haduh 6,635m.
Kumta kat haduh ka 24 tarik Rymphang 2023 na ki 1700 tylli ki krem la lah ban rung haduh 1100 tangba kiba bun ki dei kiba ym pat lah ban pyndep lut ka jingrung bad jingthew jingwoh.
Kat haduh mynta ka jingrung ïa ki krem ha ka jylla ka la poi sha ka 537 .6 Km bad ki dang bun ki ban dang hap ban rung bad shim jingthew. Ha kine ki jingrung krem mynta ba la 31 snem kynthih la lap ba kiba bun ki krem ki dei kiba don ruh bad ki wah hapoh jongki bad kiba la oh dur bad pyni tynnad da ki bor mariang ryngkat bad ki jingthaw bapher bapher ba im ha kine ki wah.Kine ki krem hapoh ka jylla kim don jingiapher satia na kiwei kiwei ki krem ha kiwei ki ri.
Ka MAA ka ai khublei kyrpang ïa ka Directorate of Sport and Youth Affairs bad ka Meghalayan Age Limited namar khlem ka jingkyrshan jongki kane ka jingrung bad jingthew jingwoh bad buh jingkheiñ ïa ki krem kan ym long kaba jop.
