Ngam ïohi ban don jingeh ha jingïakhun pyrshah ïa ki kam sniew lada ki samla ki ïatreilang : Banteidor
Shillong, Nailur 11: Hapdeng ki jingsniew ba har rukom kiba nang ïai long kum ka jingpang bampong ïa ka imlang sahlang khamtam u drok uba la suhthied ym tang ha nongbah Shillong hynrei ha kylleng ki jaka ka Jylla Meghalaya bad ktah ia ki khun samla, u Bah Banteidor Lyngdoh, MLA ka Mawkynrew Constituency u la ong ba um ïohi pat ban don jingeh ban ïakhun pyrshah ïa ki kam sniew lada ki samla ki don ïa ka jingïatreilang.
ïa kane une u MLA u la kren kum u kongsan ha ka jingïalang pynhap pyrda ka Shillong Archdiocese Catholic Youth Movement (SACYM) Zone -V ïa ka lympung ïalehkai ba shi sien shi snem jong ka myn ha ka 09 tarik u Nailur, 2023 ha Jongksha.
Da kaba ai jingïaroh ïa ki khun samla ka Balang kiba pynlong ïa kum kine ki lympung ïalehkai, u la ong, “Kane ka pyni ïa ka jingïatreilang hapdeng ki samla ban kyntiew ïa ki kam ïalehkai bad phah pat ka khubor ban kiar na ki kam kiba lah ban ktah ïa ka met ka phad bad kiba long pat ka jingtroiñ ïa ka imlang sahlang”.
Shuh shuh, une u nongmihkhmat u la ong ba ka long kaba sngewkhia ban ïohi ba u drok u la teh mraw ïa ki hajar ngut ki samla bad kumta ka jingïatreilang ki samla lyngba ki kynhun balang, ki seng samla shnong, ki sports club kin dei ki atiar bad ki stieh ïada ïa une u jait jingdih ba sniew tam.
“Kawei kaba kongsan eh ka dei ka jingskhem jingmut ban ong em ïa u drok bad ki samla kiba la kham sha khmat ki dei ban ïa phylliew jingmut bad ai jingpynshai sha kiwei halor ki jingktah une u jingdih pynbuaid “, la kyntu u Bah Banteidor bad pynpaw pat ka jingsngew kmen ba ki samla lyngba kine lympung pat ki ailad ïa ki samla ban sei ïa ki sap ki phong ialehkai.
Ha kane ka lympung, ki saw tylli ki Parish ki la ïa shim bynta ha ki jingïakob ïalehkai bapher bapher ki kynthup ïa ka Laitkor, Mawkynrew, Jongksha bad Mawryngkneng bad ka Parish kaba la ïoh ïa ka nam lahduh ka dei ka Laitkor Parish.
Ha ka sngi pynhap pyrda la ïa sakhi lang da u Fr Sylvester Synrem, uba peit ïa ki samla ka Zone V, u Fr Suresh, Parish Priest, u Fr Anthony M Joseph, Assistant Parish Priest, u Bah Olet Kharsahnoh, Sordar Jongksha bad kiwei pat.