Hiar ka Myntri sha Sohra ban jurip jaka sumar, la jan dep ka hospital Ayush ba 10 klur

Shillong, Nailur 11 : Ka Myntri ka tnad ka Koit ka Khiah ha ka sngi Nyngkong ka la hiar sha Sohra ban leit jurip ïa ka jingpyntrei ïa ka Ayush Hospital ba 100 jingthiah kaba la tei haka jingmang pisa kaba 10.55 klur tyngka.
Ha katei ka jingleit jurip, ka Myntri ka la lap ba 90 persen ka kam ka la dep bad la khmih lynti ba yn pyndep noh ïa ka shwa u Risaw 2023.
Na ka liang ka Myntri ka la pynpaw ba ynda la dep katei ka hospital kan long ka jingkyrkhu kaba khraw ïa ki nongshong shnong ka thain Sohra baroh kawei namar ka lah ban ai ka jingshakri naduh ka OPD, IPD bad ruh ia kito kiba shah sumar ha ka por armet.
Ha kajuh ka por ka Myntri ka la ong ruh ba kan sa ïakren bad u Myntri ka tnad PWD ba dei ruh u Symbud Myntri Rangbah ka jylla, Bah Prestone Tynsong ban shna pynbha noh ïa ka surok ba don kumba 2kilometer ei ei ban poi sha katei ka jaka sumar.
Ka Myntri hadien kane, ka la leit ruh ban jurip ïa ka Sohra CHC kaba dang pynheh shuh shuh mynta. Ha ka jingleit jngoh sawdong katei ka jaka sumar, ka Myntri ka la ai ka jingïaroh ïa ka kynhun ki doktor bad ki nongpeit ïa katei ka hospital kiba la lah ban pynlong ïa katei ka jaka sumar kaba paka khamtam eh ha ka khuid ka suba.
La ïathuh ruh ba katei ka jingtei thymmai yn buh ruh ïa ki kor ki bor na ka bynta ban puid, bad kiwei ki lad jingsumar.
Hadien kane pat ka la leit ruh ban peit ïa ka RKM Hospital Sohra bad pynpaw ka jingsngewhun halor ka jingshakri ba ka RKM ka ai na bynta ki nongshong shnong ka thain ha ka koit ka khiah.