Shillong, Nailur 11: Ka Khasi Authors’ Society (KAS) ka la pynlong ka jingrakhe ïa ka sngi ka thoh ka pule (Literary Day) da kaba pynlong ïa ka lympung ïamir jingmut halor ka phang “Ka tip kur tip kha ha u Khasi”.
Ïa kane ka lympung la pynlong ha Lady Keane College, Shillong, ha kaba la wan plie ïa ka lympung da u CEM ka KHADC, u Bah Pynïaid Sing Syiem, uba long u Kongsan.
U Bah Pynïaid haba kren ha kane ka jingïalang, u la ai khublei kyrpang ïa ka KAS kaba la trei shitom mynta la 44 snem na ka bynta ban pynim bad pynïar bad pynriewspah ïa ka Ktien Khasi.
U la ai ka jingïaroh ruh ïa ka Seng ki Nongthoh kaba la lam khmat ha ka jingïaleh ban pynrung ïa ka Ktien Khasi ha ka Khyrnit kaba Phra jong ka Riti Synshar ka ri India. “Nga sngew ban ai ka jingïaroh kaba khraw ïa ka KAS namar ka jingmih jong phi ban ïakhun ban pynlong ïa ka Ktien Khasi kum kawei na ki ktien ba la ithuh da ka ri India da kaba pynrung ha ka khyrnit kaba phra”, la ong u CEM. U la kular ruh ba ka District Council kan ïatrei lang ha kaba ïadei bad kane ka bynta khnang ba ka jaidbynriew Khasi kan ïohi ba ka ktien la jong kan long ka ktien ban ithuh da ka riti synshar jong ka ri.
Na ka liang u CEM, u la ïathuh ruh ba ka KHADC ka la mang ban pynlut pisa haduh 50 lak tyngka ban ai sha kino kino kiba lah ban wad bniah bad ban lumthup ïa ki jingtip kiba bniah shaphang ka jaidbynriew Khasi bad ka rukom im jong ki. Ha kane ka jingïalang, u CEM u la kular ruh ban ai jingïarap 8 lak tyng ka sha ka KAS na ka bynta ki jingtreikam kaba bun jong ka.
U President jong ka KAS, u Dr. DRL Nonglait haba ai ïa ka jingkren mait phang, u la ong ba ka jingpynlong ïa ka lympung tip kur tip kha ha u Khasi, kadei kaba donkam haduh katta katne, namar ba ka jaidbynriew Khasi ka long kham kyrpang ïa kiwei pat ki jaidbynriew kadei halor ka tip kur tip kha. Namarkata ka daw donkam ban hikai ïa ki longdien jong ka jaidbynriew, khnang ba kane ka nym jah noh hapdeng ka pyrthei kaba bun ki jingkylla.
Ha kane ka sngi ka Seng ka la pynkup burom ruh ïa ki Samla kiba leh bha ha ka Sobjek Khasi ha ka eksam SSLC, HSSLC, BA bad MA.
Ha kane ka lympung la buh ruh ïa kiwei de ki pat jingïaphylliew jingmut kiba la long ka jingmyntoi kaba khraw na ka bynta ka jaidbynriew. Kawei pat ka prokram ha kane ka sngi, ka long ka jingpyllait paidbah ïa ki kot ba la thoh da u Bah KW Nongrum, bad u Prof. Kympham Nongkynrih.
