Shillong, Nailur 11: Ka Seng Hynñiewtrep Intergrated Territorial Organisation (HITO) ka dang ap ïa ka rai jong ka ïingbishar halor ka jingpan jamin ïa ki 5 ngut ki dkhot ba la shah kem na ka jingïakulmar ha ka 4 tarik mynta u bnai.
Ha ka jingshim bishar mynta ka sngi ha ka ïingbishar u Additional District and Session Judge, ki nongïalam jong ka Seng kynthup ïa u Bah Donbok Dkhar bad kiwei kiwei ki la leit ban synran lang sha katei ka jingbishar kaba la neh haduh ka por janmiet.
Haba ïakren bad ki nongïalam ka Seng ki la ïathuh ba kiba la shah kem bad pan jamin ban lait noh ki long san ngut. Tangba kim pat kwah ban ong eiei namar ba kim pat ïoh ïa ka hukum na ka ïingbishar bad ki la ong ba kin sa kren ynda la ïoh ïa ka hukum na ka ïingbishar. “Ngim pat lah ban ong eiei mynta namar ba ngi dang ap ïa ka rai ne ka hukum na ka ïingbishar”, la ong u Bah Donbok ha ka por ba u mih ban leit phai noh na ïingbishar.
Lah ban kdew hangne ba ka jingïakulmar ka la mih ha ka 4 tarik mynta u bnai hapdeng ki dkhot ka HITO bad ki Pulit hajan ka surok ophis DC ha Shillong, haba ki nongïalam ka HITO bad ki dkhot ki thmu ban tur jubor sha Secretariat hadien ba ki la wanphai na ka jingleit hajir ha Sadar Police Station namar ka jingkhot hajir ki Pulit ïa u President.
Ha katei ka jingïakulmar ka la don ka jingïakhynñiat ka jingïakwang tear Gas bad Stun Grenade na ka liang ki Pulit katba na ka liang ki HITO pat ki la kawang da ki maw. Ka la don ruh ka jingshah ther Stun Grenade wat ha dukan sha ruh kaba don ha Parking Lot jong ka Municipal hajan kane ka jingïakhih. Ki la don ruh ki Pulit kiba la mynsaw bad kumjuh ruh ki dkhot ka HITO, kynthup ïa u President kiba la mynsaw ba ka jingshah bom shah tied bad ka jingshah kawang tear gas bad stun grenade ha ki Pulit.
