Shillong, Naiwieng 09: Ka jingïakhun Semi Final jong ka lympung NEHU Inter College Cricket (Men) Tournament 2023 kaba la long hynne ka sngi (9 tarik Naiwieng) ka la jam sha kaba kut ha kaba ka St. Anthony’s College ryngkat bad ka BBS College ki la ïohrung sha ka final hadien ka namjop.
Haba phai sha ka jingïakhun semi final kaba nyngkong, ka jingïalehkai ka la long hapdeng ka NEHU, Shillong pyrshah ïa ka St. Anthony’s College, hadien ba jop ïa ka jingkynting (toss), ka NEHU, Shillong ka la jied ban bol nyngkong.
Ha ka pali tied, ka St. Anthony’s College ka la buh ïa ka thong haduh 168 ron naki 20 over bad pynsah sa 3 wicket. Haba beh ïa kane ka thong kaba 169 ron ba la buh da ka St. Anthony’s College, ka NEHU, Shillong ka la ïohlad ban kynjoh tang sha ka 115 rron na ki 19.3 naba shah pynhap baroh ki wicket.
Ha kaba kut ka St. Anthony’s College ka la khur ïa ka namjop da 53 ron.
Ha ka jingïakhun semi final kaba ar, ka jingïakhun ka la long hapdeng ka NEIAH, Shillong pyrshah ïa ka BBS College. Hadien ba jop ïa ka jingkynting, ka NEIAH, Shillong ka la jied ban tied nyngkong bad buh ïa ka thong da 117 ron hadien ba shah pynhap baroh ki wicket.
Haba beh ïa kane ka ron ba la buh da ka NEIAH, Shillong, ka BBS College, Shillong ka la pyndep ban kynjoh pura tang hapoh ka 8.1 over bad shah pynhap tang 3 wicket. Lyngba kane, ka BBS College ka la jop da 7 wicket ban jam sha ka final.
Ka jingïaknieh namlahduh jong kane ka lympung kan long hapdeg ka St. Anthony’s College pyrshah ïa ka BBS College, bad ïa ka final yn pynlong ha ka 11 tarik Naiwieng, 2023, kata lashai ka sngi ha ka por 8.30 baje mynstep.
