I-League: Mar shi poiñ ïasam ka Shillong Lajong FC bad ka NEROCA FC
Da ki hajar tuid ki paidbah ka jylla ban kyrshan ïa ka Lajong.
Shillong, Naiwieng 09: Ka Shillong Lajong FC ka la hap ban hun ïa ka shi point hadien ba ka la ïakhaid ha ka jingïalehkai I-League kaba la long hynne ka sngi hala ïing, ha madan 1st Ground jong ka SSA, Polo pyrshah ïa ka NEROCA FC.
Haba phai sha ka jingïakhun haduh kaba kut jong ka por baroh ar kynhun ki la ïoh ban thep mar shi kol.
Ha kane ka sngi la ïoh ban sakhi ïa ka jingwan-tuid u paidbah ka jylla ki ba la kyrshan shitrhem ïa kane ka kynhun kaba wanphai biang mynta ha ka I-League hadien saw snem, ha kaba ki jingwan ki nongpeitkai ka la kot haduh 5585 ngut.
Ka Shillong Lajong FC kaba la khmihlynti ban khur ïa ka namjop na kane ka jingïakhun kaba long hala ïing ka la ïoh ban lamkhmat nyngkong lyngba ka kol kaba la thep da u bak (defender), u Daniel Concalves ha ka 34 minit.
Hynrei watla kata ruh, ka NEROCA FC ka la khie im biang, hadien ba ïoh pynïakhaid u rangïalehkai ba na Jamaica, u Fabian Reid ha ka 79 minit.
Hadien ba la shah pynphai, na ka liang jong ka Lajong ka la ïakhun katba lah ban thep ïa ka kol pynjop bad ka la ïoh ruh katto katne ki kabu hynrei kam shym la lah ban pynurlong bad haduh kaba kut ym shym la don ba lah ban pynïakhlad bad ka jingïakhun ka kut ha ka jingïakhaid da mar 1 kol.
Ha kaba kut jong ka jingïalehkai, u Renan Paulino De Souza jong ka Shillong Lajong FC u la ïohpdiang ïa ka khusnam rangïalehkai ba kynsai jong ka jingïakhun lane ‘Man Of The Match’.
Haba phai sha katei ka kynhun kaba na Manipur, ka NEROCA FC ka la ïoh ban kyntiew shi point ha ka miej hadien kane ka jingïalehkai na ki lai sien ïakhun, haba phaidien, kane ka kynhun ka la mad namrem ar sien, kata ha ka Sreenidi Deccan bad ha ka Gokulam Kerala.
Hynrei na ka liang jong ka Shillong Lajong, la ar sien lynter mynta ka la ïakhaid, kawei kaba long shabar nala ïing pyrshah ïa ka Mohammedan SC, bad ka kynhun ka ïeng mynta ha ka kyrdan ba 9 jong ka miej da 2 poiñ.
Ka Shillong Lajong kan sa ïakhun biang ha ka 14 tarik Naiwieng (kaba hap ha ka sngi Hat Majai) hala ïing pyrshah ïa ka Sreenidi Deccan kaba na Hyderabad ha ka por 2 baje nohphai sngi.