Kumba ju long man ka san snem, kane kajuh ka lyer ka ïai beh bad kan ïai bteng ban beh katba ki paidbah ki dang biej ha ka jingpah jingphon jong ki kyrtong ne ki kynhun bapher bapher kiba pynkhreh na ka bynta ka elekshon la ka long na bynta ka elekshon MP kaban sa long shen ha u snem ban wan bad ruh na bynta ka elekshon MDC kaba lehse kan sa long kham hadien.
Lada ïa kren beit tang ïa ka elekshon jied nongmihkhmat ha rilum Khasi – Jaintia barabor la ju ïa kren shaphang ka jingjur ka bor pisa khamtam ha ki khyndiat bnai shwa ka elekshon hynrei katei baroh ka shu kut tang ha ka jingïakynthoh ïa kynnoh bad ka la shu kut kumto ha shiteng suiñ. Jin lada don ki riewshemphang lane ki samla kiba nud ban ïakhun pyrshah ïa ka bor pisa ha ka por elekshon lehse ki paidbah kin ïoh da kiwei pat ki nongmihkhmat kiba khem pher.
Jan man samoi la ju ïohsngew ba tang shu jan ka elekshon la ka long sha Ïing Dorbar Thawaiñ ka jylla, lane sha Parliament kumjuh sha ki District Council ka jingïakren na ki kyrtong ka long beit ba hap ban ïakhun ïa ka bor pisa, kaba thew beit ba baroh kito kiba jop kidei beit kiba thong da ka pisa ïa ki. Hynrei, lada kren ïa kane ka bynta ruh bun kiban kyntait namar don ki kyrtong kiba ong ba ki jop khlem da donkam ban theh pisa shibun.
Kumta lada ïathir bha ïa kane ka bynta, kumba 80 ne 90 persen ki kyrtong kiba ïakhun kin ong beit ba kim don pisa hynrei ki kwah ban mih bad aireng namar ki kwah ban ïoh ïa ka jingjop da ka jingieid u paidbah. Tangba, don pat ki jaka kiba ju pynpaw ba kam myntoi ban kren shaphang ka jingieid ne ka jingshaniah na ki paidbah namar tang shu poi ka por thep vote ki paidbah ki la klet lut ïa kaei kaba ki nongmihkhmat ki trei hynrei ki kynmaw beit tang ïa kaei kaba ki ïoh ha ka khyllipmat ha lynti sha jaka thep vote.
Lada kum kitei ki jingkynnoh ki ïai mih, ym sngewnang shuh ïano shuh yn kynnoh, la yn kynthoh ïa u nongai ne ïa u nongshim. U kyrtong ba pli tang ban pyntikna ba un jop um banse ban theh lut katba don ei da ka jingkyrmen ba un jop kum u nongmihkhmat paidbah. Kane lehse ka jingkynthoh kaba ju mih ha shwa ka elekshon kam dei kaba treikam ha baroh ki constituency hynrei ki don ki jaka ba ka treikam borbah bha ka bor pisa.
Ym lah ruh ban len ba kane kadei ruh ka juk kaba kito kiba kham duna ka pla tyngka kim nud shuh ban mih aireng kumba long ha ki khyndiat phew snem mynshwa ba ki paidbah ki mih hi ban synniang lang na ka bynta u kyrtong. Pynban ka jinglong jingman ha kine ki por mynta ka long markhongpong ha kaba ki paidbah ki khmih lynti ban ïoh khambun bad kim da salia than ruh ban leit mih bunsien sha ïing ki nongmihkhmat lane ki kyrtong ban leit pan jingïarap da kaba ai daw laiphew rukom.
Ka Meghalaya lada ka kwah shisha ban ïoh ïa ki nongmihkhmat kiba stad, kiba shemphang bad kiba la ih bha ha ka saiñpyrthei ka la dei ban kyntait lut ïa kito kiba wan thong da ka pisa bad lada ki shim ruh ki dei pat ban rai da ka jingsngewthuh jingmut lane da kaba pyrkhat 100 sien na ka bynta ka lawei jong ka jylla bad ïa ka pateng jong ki khun ki kti.
Haba phai pat sha ki constituency kiba kham shai bad lah ban ong kiba eh bha ban shah pynbiej ha ka bor pisa, hangne pat ka long ba kin pynap shibun ki jingkylli ïa kito ki MLA/MDC jong ki haba ïadei bad ka rukom treikam jong ki ha ki saw snem tam. Lada dei pat na ka bynta ki kyrtong ba dang shu mih thymmai, ki jingkylli ba kin buh kan long kiei ki jingduna ba u MLA/MDC u don kaba pynshlur ïa ki ba kin mih ban ïakhun. Dei ruh ha kum kane ka samoi ba ki paidbah ki ïoh ban pyrkhat bad bishar bniah namar bun kiwei pat ki kyrtong kin wan ban pynshai ne ban kular ha khmat jong ki ïa ka thong kaba ki kwah ban trei lada ki jop kum u nongmihkhmat jong ki.
Bunsien hi ka jingrem noh jong ki MLA/MDC tang hadien shi samoi ba ki jop kadei namar ka jingkular jong ki bad ka kam kaba ki trei kam ïahap satia. Don ruh kiba la mad noh ïa ka jingshah rem tang namar ba ynda ki la jop ki la kiar wat ban kynduh ïa ki nongthep vote khamtam eh ïa ki nongkyrshan la jong. Ka daw kaba hakhmat kaba ju long ka daw rem ïa ki kadei ba kaei kaba ki kular ha shwa ka elekshon kam ïahap wat tang shi pawa na kaba ki pyndep. Ka jingmih jong ki nongïalam ban leit kyrshan sha kiwei pat ki kyrtong ba thymmai ynda la jan ka elekshon ruh kadei ka dawbah kaba pynrem ïa ki.
Hynrei ha kawei pat ka liang, don ki nongmihkhmat kiba trei shisha na ka bynta ki paidbah nongthep vote hynrei tang namar ki klet noh ban burom ïa ki nongïalam, ynda la dei ka por ban jied biang ïa ki nongmihkhmat, bun ki shah pynbiej noh ha kiwei ki kyrtong. Ym lah ban len ba ki don ki nongïalam kiba lah ban pynkohnguh ïa ki spah ngut ki nongkyrshan ruh ha ka por elekshon bad kane hi kadei kaba ktah bha ïa ki kyrtong lada jia ba kim lah ban pynhun ne pynbiang ïa kum kitei ki nongïalam.
