Napdeng ki 60 tylli ki konstiwensi, 58 tylli ladep ban thaw ïa ka Block NPP Famers Front

SHILLONG, Jymmang 20: Ka National People Party, Farmers Front napdeng ki 60 tylli ki Constituency hapoh ka jylla ki la lah ban thaw haduh 58 tylli ki Block hapoh ka jylla Meghalaya bad kaba sah mynta ka long satang ar tylli ki Block.
Ïa kane la pyntip da u Chairman jong ka Farmers Front State Level u Bah Himalaya M Shangpliang ha ka jingialang ban pynskhem ïa ki nongkit kam jong ka NPP Farmers Front Mawsynram Block, kaba la long mynta ka sngi ha ka shnong Mawsynram ha ka ïing shong jong ka Dongrum, Mawsynram.
Haba kren ha ka jingïalang u Bah Shangpliang u la pyntip ba kaei ka daw ba la seng ïa ka NPP Farmers Front, ka daw ba kongsan bad kaba ha khmat eh ka long tip ïa ka jingeh ki nongrep bad ban pynïajan ïa ki nongrep bad ka sorkar jylla kaba la ïalam hi da ka NPP.
Ïa kane ka Farmers Front la sdang nyngkong na ri lum Garo bud pat sa ha ri lum Jaintia, sha them ri Bhoi bad hadien sa ka West bad South West bad mynta ha East Khasi Hills District.
Shuh shuh u la batai ba hadien ba la dep ban thaw ne pynskhem ïa ki nongkitkam jong ki Block, kala dei ka kamram jong ki nongkit kam ban leit mih sha ki nongrep ba phin tip ïa ki jingeh ba ki kynduh bad dei ma phi pat ban pyntip sha ki nongialam jong ka state level khnang ba kin ioh pynsngew sha ka sorkar bad ka sorkar pat kan phah ïa ki ophisar ban weng ïa kita ki jingeh.
Kumba long mynta ha them ri Bhoi, ki nongri dohkha mynta kila buh ïa ki jaka ban pynkha symbai bad kane kala ïarap bha ïa ki nongrep u la ong.
“Mynta kaba donkam ka long ban pynrung kyrteng jong ki nongrep kiba dei jong ka NPP namar ba kan pynsuk ïa ki kyrtong na ki 60 tylli ki constituency ban ai jingïarap lada lah dei ka por bad kumba long mynta lah don haduh 15 hajar ngut ki nongrep kiba la dep ban pynrung kyrteng” ong u Bah Shangpliang.
Ki nongrep kin kynthup ïa kito kiba trei ïa ki kam ha ka kam ri jingri kiba hap hapoh ka tnad AH Veterinary, ki nongri Dohkha na ka tnad Fisheries, ki nongrep kiba hap hapoh ka tnad ka rep ka riang ne Agriculture bad na ka tnad Horticulture.
Na ka liang u Bah Egentstar Kurkalang u la ong haba kit ïa ka lyngkor dei ban leh da ka jingkit khia ïa ka kam, namar haba ngi trei bha ïa ka kam kan rah ïa ka burom jong ka sorkar bad ïa ka party.
Ha kane ka sngi la ioh ruh ka jingkren na u Bah Elias Kharbihkhiew uba dei u District President jong ka East Khasi Hills bad u Bah P Dohling uba dei u Secretary ka NPP Mawsynram Block.
Ki nongkitkam jong ka NPP Farmers Front Mawsynram Block baroh ki don haduh 50 ngut.