Jowai, Jymmang 20: Ka Warjaiñtia Students’ Union (WjSU) kala leit buh jingkyrpad ha u ma Jesse Suiam, Executive Member ba dei peit ïa ka Trade jong ka Jaintia Hills Autonomous District Council ban buh kawei ka District Council Check Gate ha ki thaiñ Dawki NH 206.
Ha ka jingthoh ka seng ka sngew donkam ban pyni ne kdew ba ka JHADC kaba dei ka nongpeit nongkhmih ïa ki jaka puta hapoh ka sixth scheduled katkum ka Indian Constitution ka lah buh ïa ki District Council Check Gate ha ki thaiñ Ratacherra,Sonapur NH 6 ki ba long ki entry bad transit point ban peit ban khmih ïa ki mar ki mata, ki kali kit mar kiba rung bad ba mih hapoh u pud u sam ka District Council.
Halor ka jingkiew ka khaïi pateng hapdeng ka India bad Bangladesh ha ka kad khaïi bar ri ha Dawki. Ka Seng ka sngew donkam ban don kum kitei ki District Council Check Gate ha ka thain Dawki.
Ka jingdon ka Check Gate kan peit ban khmih bad ban regulate ïa ki mar ki mata, ka kit ka bah ha u pud ka District Council. Ban verify bad check ïaki trucks bad ki kali kit mar kiba rung sha Bangladesh lyngba ka Dawki.
Ban pynkhlaiñ ïa ka khaïi ka pateng katkum ka aiñ bad ban ïada ïa ka jingkit be aiñ ïa ki mar ki mata. Ban ïada ïa ka interest ki nong Jaiñtia kane ka thaiñ. Ban pynkhlaiñ ïa ka jingleh khuid bad ban khmih ïa ka jinglum khajna ka District Council.
La pynsngew ba ka jinglong kyrpang ka Dawki kum ka kad khaïi bar ri, ka seng kala kyrpad ïa u EM ka Trade bad ïa ka District Council hi baroh kawei ban shim khia ban thaw ne buh katei ka District Council Check Gate ha Dawki NH 206 naka bynta ka jingmyntoi ki paidbah hapoh u pud u sam ka District Council. La pynkut ka kyrwoh na u Publicity Secretary ka seng samla Nemison Rymbai.
