Shillong, Naiwieng 27: Ka jingthom bor ia ki kynthei khynnah ha Meghalaya ka la nang kiew bad ka la kot haduh 58 percent ha ka jingdon jong ki kam shah thombor ki Kynthei bad kane kala paw ha ka sngi plie ïa ka “NEYI CHETNA 2.0” National Gender Campaign ba la pynlong da ka Meghalaya State Rural Livelihoods Society (MSRLS) ha state central Library, Shillong.
Haba pynpaw ba donkam ban ïakren halor ka jingjyllei ki kam shah ïuhroit ka longryngïeng ki kynthei, la pyntip ba ka 58% ki kam shah thombor ki kynthei ka la paw haka Website jong ka Meghalaya Police kata naduh 2007 haduh 2022 bad la paw ruh ba ka jylla ka la sakhi bun bha ki kam shah thombor ki khynnah hapoh ka Protection of Children from Sexual Offences Act, 2012 ne POCSO Act.
Kum shi bynta ban kyntiew ïa ki kynthei bad longkmie, ka Meghalaya ka la pynkha haduh 45 hajar tylli ki Self-Help Groups (SHGs) ha kaba 4 lak shiteng ki longkmie ki dei ki dkhot ha baroh kawei ka Jylla .
Ka kaiphod naka NFHS, ka pyni ba palat 77% ki longkmie kim kwah ban pyntip ne ujor ne ïakren eiei haba ïadei bad ka jingshah thombor jongki.
Ka Nayi Chetna Campaign ka don ïa ka thong ban kyntiew ïa ka hok ki longkmie, ban pynshlur ïa ki ban im ïa ka jingim khlem kano kano ka jingsngew tieng ne syier mynsiem bad ban ïada ïa ki na kino kino ki jingshah thombor.
ïa kane ka Campaign la plie haka 25 tarik mynta u bnai bad la pynlong ruh ïa ka ha ki 34 tylli ki Jylla ka Ri bad ha ki UTs haduh ka 23 tarik Nohprah. ïa kane ka Campaign ba manla u snem yn ïalam daka DAY-NRLM’s Self-Help Groups kaba don palat 9.8 klur ngut ki longkmie na kylleng ki shnong ka Ri kaba ïaid ryngkat bad ka Jan Andolan.
Ha kane ka sngi ka Myntri ka tnat ka koit ka khiah ka Kong Ampareen Lyngdoh kala wan shim bynta bad ka la kren halor ka jingshah thombor ki kynthei bad ha kajuh ka por ka la kren halor ka jingdonkam ban ïada ïa ka hok ki khynnah bad ki longkmie.
Ka kaiphod jong ka World Health Organization (WHO), ka kam ba 1 na ki 3 ngut ki longmie ki ngat haka jingshah thombor bad ka jingshah batbor haka jingim.
Ka Kong Ampareen ka la pynpaw ba kane ka sngi ka long kaba kyrpang ïa ki longkmie bad ka la ai khublei ïa ka NRLM kaba la wanrah kum kine ki programs ki ban ai mynsiem ïa ki longkmie ban ïeng bad ban ïakhun ïa la ka hok.
Haba pynpaw baka Jylla ka don shakhmat ban kyntiew ïa ki longkmie, kala ong ba ka jingdon ki program bapher bapher kiba ailad ïa ki longkmie ban don bynta lang kan ïarap ban ïakhun pyrshah ïa ki kam shah thombor.
Ha kane ka sngi, la wan shim bynta lang da ka Deputy Commissioner, East Khasi Hills ka Kong R.M Kurbah, u Sampath Kumar, IAS, Principal Secretary & Development Commissioner, Community and Rural Development (C&RD), u Bah Ronald Kynta, Chief Operating Officer (COO) of Meghalaya State Rural Livelihoods Society (MSRLS), ki ophisar na ka, ki Self-Help Groups (SHGs) Cluster Level Federation (CLF), Community Cadres, ki rangbah shnong bad kiwei kiwei de.
Ha kane ka sngi la sakhi ka jingrwai pdiang sngewbha na ka Rympei Village Organization, ka video halor ki khana shaphang ka jingshah thombor ki longkmie bad la pyni ruh ïa ki kam bha jong ka Cheanny D. Sangma bad Batskhem Lyngkhoi kiba ïarap ïa ki lanot.
Ha kane ka sngi, la sakhi ruh ki jait jingshad na Jirang Block, ka jingshah pynkupburom ki Village Organizations (VOs), Cluster Level Federations (CLFs), Community Cadres, bad ki rangbah shnong kiba trei naka bynta ka bha ka miat ki longkmie.
