Ka jingsniew ha ka imlang sahlang ha ka Jylla ka la nang hïar dor katba nangmih ki sngi bad i kumba la kiew skong lut ha baroh ki lïang namar katba nangmih ki sngi, ym tang u rangbah uba leh ïa ki kam sniew hynrei mynta la poi ka juk ba wat ki khynnah ruh ki ïabud tynneng ïa ki kam sniew kiba laiphew jait. Ki lad pathai khubor ki thoh bad man ka sngi ïa ki kam sniew kiba laiphew jait phew rukom, hynrei katba nang pynmih ïa kine ki kam sniew pynban i kumba ki nangkharoi bad ym kut satïa. I kumba baroh baroh ki ïashim kabu bad i kumba ki ïoh mynsiem ban ïa bud tynneng lang ban ïangop sha ki kam jyrsieh ka jingsniew. Man ka sngi, la shu ïohsngew beit ïa ki kam leh donbor, ki kam thombor ki kam sniew ba lei phew rukom.
Hynrei ka jingkylli ka mih hangne, hato, man la uwei-u-wei ba ba la kot ïa ki bor sngewthuh ne ki bor pyrkhat, ngi la ju puson mo ba balei ki mih kine ki kam sniew kiba ha rukom ha ka imlang ka sahlang kaba la pyntad dor ïa ka hok longbriew manbriew bad haduh ka akor ka burom kaba la hïar dor arsut kaba la ïohi ba i kumba aiñ Blei ne ka ain Briew kam don shuh.
Na ka por sha ka por, ki mih ki kam tuh ki kam thiem, ki kam pynïap, ki kam lute, ki kam leh beijot ne lehdon bor ïa ki kynthei ki khynnah ha kaba kam don shuh kata ka jingshngain ha ka imlang ka sahlang khamtam ïa ki kynthei ki khynnah. Khyndïat pat lah ban ong hangne ba man la uwei-pauwei u la dei ban puson ïa lade shimet halor ka jingkynrei kine ki kam sniew kiba la ktah shisha ïa ka shongsuk shongsain ha ka imlang ka sahlang jong ka jylla.
Ym lah ruh ban len bunsien haba ïohi ïa ki kam sniew la ka long ha ki Kot Khubor ne ki kor Telivision la ïoh sngew tang kata ka jingkren ïa kynii hapdeng ki para briew bad ka jingkhnium kaba mih na ka shyntur kaba ki da sngewpangnud ba kynrei ki kam sniew. Ka jingkylli ka mih pat hangne. Hato, katno ngut kiba ju puson ne pyrkhat na ei ka tynrai jong ka jingsniew ka wan bad balei ba ka jur ki kam sniew ha kine ki sngi?
Sngew Sangsot ba ki briew ha kine ki sngi la ka long naduh ki khynnah, ki samla bad haduh ki tymmen ki San tang namar ka spah pyrthei bad ba ki ïa beh ïa kata ka ‘Rongphong Pyrthei” bad kim don por shuh ban puson ne ban pyrkhat halor ki tynrai ba ka jingsniew ka sdang ban mih. Hynrei ki la shuh ïa beh ïa kata ka spah pyrthei bad ki klet noh ban puson ne ban bishar ïa ka tynrai ba ka jingsniew ka mih kaba la ktah shisha ïa ka shongsuk shongsain ha ka imlang ka sahlang ha ka jylla bad ka ri.
Lehrain ban pynpaw sha ka pyrthei ba ka Jylla Meghalaya ka don ha ka thup ba bun tam kiba long nïam Khristan. Hynrei shaei kane ka nam ka burom namar i kumba la ïaklet lut ïa ka ain Blei ne wat ïa ka ain briew namar ki kam sniew ki jïa man ka sngi. Da khongpong ha kine ki sngi ka jingsniew ka la shong kulai ha man la uwei-pauwei u Briew kiba la klet noh ïa la ka jong ka tynrai kiba la pyrshang ban beh ïa ka Rongphong bad ki jingkwah brai kaba la pyntroin shisha ïa ka hok Longbriew Manbriew. Ngin nai da ïa tai sani shaphang ki tynrai ba ka jingsniew ka mih, hynrei to ngin ïa phai dien khyndïat ban puson kumba ong kine ka kyntien, “ka kam Leh isnei ne ka kam babha ka sdang na la Rympei” khnang ba ngin sngewthuh ba balei ba kynrei ki kam sniew kam smeh ha kine ki sngi.”
Kum ban ban ktien, ha kine ki sngi kano kano ka longïing longsem kim don por shuh ban hikai ïa la ki khun ki kti ha la “ Sawdong ka Lyngwïar Dpei” namar ba ki la ïa beh ïa ki rongphong jong kane ka pyrthei bad kim don por shuh ruh ban shim ïa la ka jingkitkhlieh ïa ki khun ki kti ha kaba ki la ai mon khlem da tehlakam ha la ing la sem.
Bad ym donkam hi ruh ban ïa puson halor ki daw ba ki jingsniew ki la kynrei ha kine ki sngi, Ngi lah ban kren shai sha ka pyrthei, dei tang namar ba ki kmie ki kpa ne ki Longkni Longkpa ha kine ki sngi kim don por shuh ban sneng ne kyntu ïa la ki khun ki Pyrsa ha la ing la sem bad ki khun ki kti ki la im laitlan katba ki mon ha kaba ki la sdang ban leh na i kam sniew i barit bad kan sa pur pat haduh ba ki jingsniew ki la kiew skong ha kine ki sngi.
Kumba ong ka Kyntien, i jingjaw um barit, ka pyndap ïa ki phnieng ka Durïaw” ka la urlong shisha, namar tang na ka daw ba ki Kmie ki kpa ne ki Longknie ki Longkpa kim don por shuh ban tehlakam ïa ki khun ki kti ne ki Pyrsa ba ki la im laitlan ka la pynlong ruh ïa ki ban kin dang shlur ban leh ïa bun bah ki kam sniew kiba la ktah ha ka imlang ka sahlang.
Namarkata, ngin nai ïa wad shuh ïa kiwei pat ki daw ne ki tynrai ba ka jingsniew ka mih, hynrei to kum ki Longing Longsem ne ki Kmie ki kpa ngin ïa pyrshang ban hikai ïa la ki khun ki Kti ha la Rympei ka jong ka Rympei, namar dei tang ha la Rympei lah bïang ban saiñdur ïa ka hok longbriew manbriew ne ïa ka akor ka burom kaba ngi lah ban ïada na bun jaid ki kam sniew kam smeh ha ka imlang ka sahlang.
