Ryngkat ka phuh ka phieng, la pynhap pyrda noh ïa ka 38th Meghalaya State Badminton Championship ha Nongstoiñ

Nongstoiñ, Nailar 06: Ka lympung 38th Meghalaya State Badminton Championship 2023 ba la pynlong da ka West Khasi Hills District Badminton Association ryngkat ka Meghalaya State Badminton Association, ka la poi noh sha kaba kut ha ka sngi saitjaiñ ha Indoor Stadium Nongstoiñ, ha kaba ka kynhun na East Khasi Hills ka la khur ïa nam kum ka lahduh napdeng ki kynhun baroh.
Ka nam lahduh sha ka East Khasi Hills ka dei hadien ba ka la ïoh khambun ki nam jop, kata kaba la ïoh haduh 15 tylli ki nam lahduh. Nangta phra tylli ki khusnam ba ar lane runner’s up. Ha ka kyrdan ba ar lane kaba bud pat la ïoh da ka West Khasi Hills, kaba la ïoh ban khur ïa saw tylli ki nam lahduh bad saw tylli ki khusnam ba ar. Katba ha ka kyrdan ba lai la ïoh da ka West Jaiñtia Hills kaba khur lai tylli ki nam lahduh bad hynriew tylli ki khusnam ha ka kyrdan ba ar.
Lah ban kdew hangne ba kane ka lympung ha Nongstoiñ kaba la neh kumba katto katne sngi, la lah ban pynkut noh ha ryngkat ka phuh ka phieng, ha kaba u MLA na Rambrai Jyrngam u Bah R.G Momin u la long u kongsan ban pynhap noh ïa ka pyrda.
Nalor u kongsan, la donlang ruh da kiwei kiwei de ki heh ki haiñ ba kynthup ïa u Deputy Commissioner ka West Khasi Hills Bah Garod LSN Dykes, Bah H.K Thabah Additional Deputy Commissioner kum u shongknor ka organizing committee, I District Sports Officer West Khasi Hills kong Balarina Syiem, ki dkhot ka Meghalaya State Badminton Association, kumjuh ruh ki heh ki haiñ na ka West Khasi Hills District Badminton Association bad kiwei kiwei, kiba la ïoh ruh ban sam ïa ki khusnam bapher bapher.
Kumjuh ruh, lah ban pynpaw hangne ba ha kane ka lympung jong ka jingïalehkai Badminton mynta u snem, la wan ban ïashimbynta da ki 9 tylli ki District kiba don hapoh ka jylla Meghalaya kynthup ruh kawei ka Club. Baroh ki nongïalehkai ki la kot haduh 229 ngut kynthup ïa ki Kynthei bad ki Shynrang bad ha katei ka lympung, ki jingpynïalehkai ki long kumba 307 tylli ki jingïakhun.
Haba phai sha ka kyrdan ïalehkai Under-19 kynthei mar shijur (Girl’s Double), ïa ka namjop la khur da ka Ibapynhun Kharbani ryngkat bad ka Shimtihun Lyngdoh (WKH). Katba ki shijur jong ki shynrang U-19, ïa ka namjop la khur da u Pratham Majumdar & Rayneli Kharbuki (EKH).
Ha ka Mixed Double Under-19, ïa ka kyrdan ba nyngkong la khur da u Ardor Marbañiang bad ka Ibapynhunshisha Kharbani (WKH), katba kyrdan bar da u Benhanan Kharwanlang bad ka Lanïarika Tymthai (YTBC).
Haba phai pat sha ka kyrdan ïakhun kaba para marwei U-19, jong ki kynthei la khur da ka Pratiksha Joshi (EKH) wan ba ar ka Ibapynhunshisha Kharbani (WKH), katba jong ki shynrang la jop da u Gaurav Singh (EKH), wan ba ar u Benhanan Kharwanlang (YTBC).
Nangta sa ha kawei dei ka kyrdan lehkai Under 17, ki shijur jong ki kynthei, la rah da ka Geryma L Nongkhlaw & Sneha Chettri (EKH). Katba ha ka thup shijur jong ki shynrang (Men’s Double) ïa ka namjop la rah da u Pratham Majumdar & Raynell Kharbuki (EKH).
Ha ka jingïakhun kaba para marwei jong ki kynthei ïa ka namjop la khur da ka Pratiksha Joshi (EKH). Katba jong ki shynrang la rah da u Raynell Kharbuki (EKH).
Haba phai pat sha kawei de ka kyrdan ïalehkai Under-15, ka jingïaknieh namlahduh ki shijur jong ki kynthei la khur da ka Anjali Sharma & Netañia T Tariang (EKH) kiba la pynliem ïa ka Doreenzia Kharbani & Letrimai J Marak (WKH). Ki shijur jong ki shynrang la jop da u Amrit Singh & Gavind Kharbuki (EKH). ïa ka thup ïakhun kaba para marwei kynthei bad shynrang la jop da ka Netania T Tariang, bad u Gavind Kharbuki (EKH).
Ha ka kyrdan Under-13, ïa ka namlahduh jong ki thei mar shijur la khur da ka Dareen A Lyngkhoi & Ibapynhun Dkhar (WKH) wan kyrdan ba ar ka Rhema G Nongkhlaw & Ritisha Chettri (EKH).
Katba ïa ka namjop ki shijur jong ki shynrang la khur da u Ram Passah & Tuleieitre Kyndiah (WJH) kiba la pynliem ïa u Donfar Nongsiej & Rayden D Syiem (WKH).
ïa ka thup ïakhun para marwei jong ki kynthei la rah da ka Ilapynhun Dkhar (WKH), wan ba ar ka Asem Chanu Shivani (EKH). Katba jong ki shynrang la khur da u Ram Passah (WJH) u ba la jop ïa u Tuleieitre Kyndiah (WJH) ha ka final.
Haba phai pat sha ka kyrdan ïalehkai jong kiba la rangbah, ha ka Mixed Double ïa ka namjop la khur da u Kiefer Shullai ryngkat bad ka Elsarica Umdor (EKH), wan ba ar u Mebanker Shullai & Josefina Dala Passah (WJH).
Ha ka thup ïalehkai shijur jong ki kynthei la jop da ka Sejjal Joshi & Shettal Joshi (EKH) kiba la pynliem ïa ka Elsarica Umdor & Sonnal Joshi (EKH).
Haba phai pat sha ka thup ïakhun ki shijur jong ki shynrang, ïa ka namjop la rah da u Kiefer Shullai & Ritu Raj Nag (EKH) kiba la pynliem ïa u Deilang Nongpluh & Ram Najiar (WJH). Haba phai pat sha ka thup ïakhun para marwei, jong ki kynthei la jop da ka Elsarica Umdor (EKH, na ki shynrang la rah da u Mebanker Shullai (WJH).
Ha kane ka sngi la ïoh ruh ban pynbna ïa ki kyrteng jong katto katne ngut ki Umpires kiba la pass ïa ka State Umpire Exam ba la pynïaid da ka TOC, MSBA kiba kynthup ïa u Sobin Sangma, Rimanbha Lyngdoh, Deisicresha Marbaniang bad Thomas Kharsyiemïong.