Nalor ka khuid ka suba, lum u MLA ïa ki nongïalam ka thaiñ Killing ban ïa kren halor ka imlang sahlang

Nongpoh, Nailur 08 : Kum kawei na ka thong ba u MLA ka Jirang, u angnud ban wan rah ïa ka khuid ka suba ha ki shnong ba hap ha ka thaiñ Killing ha Ri Bhoi, kiba dei ruh ki shnong kiba don ha syndah ka jylal Assam, nalor ba la ïa kren halor shibun ki mat kiba ktah ïa ka imalang ka sahlang na ka liang u MLA ka Jirang, u Bah Sosthenes Sohtun mynta ka sngi u la leit ban sam da ki tin thep ñiut (Dustbin) sha ki shnong kiba don ha ka thaiñ Killing.
Na ka liang u MLA ka Jirang, u Bah Sosthenes Sohtun mynta ka sngi haba sam ïa kitei ki tin thep ñiut u la lum la lang ruh ïa ki nongïalam katei ka thaiñ na ka bynta ban ïa phylliew jingmut halor shibun ki mat kiba ktah ïa ka imlang ka sahlang.
Kumba la ïathuh da u MLA ka Jirang, mynta ka sngi la pynlong ïa ka jingïakynduh lang ha ka thaiñ Killing ha kaba ki nongïalam shnong na ki shnong bapher bapher ki la wan ban ïa shim bynta bad na ka liang jong u kum u MLA ruh u la pynpaw ïa ka jingthmu jong ka jingïakynduh lang na ka bynta ban kren halor ki jingdonkam jong ki paidbah nalor kiwei kiwei ki mat ba la ïa kren ha kane ka jingiakynduh lang.
U la ïathuh ruh ba ha kane ka sngi, ki mat kiba kham hakhmat bad kiba kham kongsan ba la ïa kren bad ïa phylliew jingmut ki kynthup ïa ka jingdonkam ban pynneh ïa ka shongsuk shongsaiñ, ban ïa kren halor ka roi ka par ki shnong ha katei ka thaiñ Killing bad khamtam ki la ïa kren kyrpang halor ka jingkynrei u drok ba la buh jingma ïa ki khun samla jong ki shnoing bapher bapher.
U la ong ruh nalor ba la ïa kren halor ka jingdonkam ban don ka shongsuk shongsaiñ bad ban wan rah ïa ka roi ka par jong ki paidbah ha kitei ki thaiñ, ha kane ka sngi ha ka jingdon lang ki nongïalam shnong la kham ïa kren sani halor ka jingdonkam ban ïa khun pyrshah ïa u drok uba long ka jingma kaba khraw ïa ki khun samla kaba dei halor ka jingkynrei sted u drok ba khamtam kitei ki shnong ki dei ki shnong ba don ha khappud ka Meghalaya bad ka Assam.
Shuh shuh, u la bynrap ruh da kaba ong, ba kum u MLA u la khot la wer ïa baroh ki nongïalam shnong bad ki paidbah katei ka thaiñ ban don kata ka mynsiem jong ka jingïatrei lang na ka bynta ban kyntiew ïa katei ka thaiñ ha baroh ki liang bad khamtam ban ïa trei lang na ka bynta ban pynduhjaid ïa ka jingkynrei jong u Drok uba long ka jingma na ka bynta ka pateng ban sa wan jong ki khun samla katei ka thaiñ, u la bynrap.
La pynkut ruh ïa kane ka jingïakynduh lang da kaba u MLA U la sam ïa ki tin thep ñiut sha ki shnong bapher bapher ba hap ha ka thaiñ Killing shi bynta kum ka thong ban wan rah ïa ka khuid ka suba ha katei ka thaiñ Killing.