Nalor ba duh ïa ka kam hikai sa ki kyndon aiñ hap kit u Babu Birbor bad ki para nonghikai

Shillong, Risaw 21: Hadien ba ki nonghikai kontrak ki la ujor da ka ejahar pyrshah ïa ki pulit namar ka jingjia shah kawang bom pynsat khmat ha ki Pulit ha ka jingtur jong ki sha Secretariat ha ka 6 tarik Risaw 2022 na ka liang ki pulit ka Sadar Police Station ki la ujor kylla da ka ejahar ïa ki nonghikai bad ruh pyngngat kyndon aiñ ïa u President jong ki u Babu Birbor Riangtem hapoh ka kyndon 41A CrPC kaba kdew ba kiba shah khot hajir ha u Pulit kin hap leit mih beit lym kumta kin shah kem.
Haba kren sha ki lad pathai khubor hadien ba mih na thanat, u Babu u la ong ba ki pulit ki kynnoh kylla ba dei ki nonghikai kiba wan lam ïa ka jingkulmar ha kato ka sngi, namar ba ki ïalam lang ïa ki sengbhalang bapher bapher bad ka jingpynkheiñ ïa ka 144 CRPC kaba la pynjari ha ki sawdong ka Secretariat.
Katkum ka jingïathuh u Babu, ki pulit ki la ong ba jyn lada ki nonghikai kim tur sha Secretariat da ka bor, ki pulit ruh kin ym sdang ban pyni bor.
U Babu Birbor Riangtem u la ong ba ka jingkhot jong ki ïa ki sengbhalang bapher bapher kadei ban ïoh ïa ka jingkyrshan ym ka jingthmu ban wanrah ïa ka huri hura.
U la ong ba ki la kynnoh ruh ba ki don katto katne ngut napdeng ki nonghikai kiba la sdang ban pyni bor ïa ki pulit ha katei ka sngi, kumta na ka liang ki pulit ki ïeng pyrshah da ka ejahar halor katei ka nongrim.
U Babu u la ïathuh ba ki pulit kin sa khot pat sa ïa kiwei ki dkhot jong ka MLPCTA lem bad ïa ki sengbhalang kiba don lang ha katei ka sngi.
U Babu u la pynpaw ïa ka jingbynñiaw, “nalor ba ngi la duh ïa ka kam bad mynta ngi dang shem shitom, mynta ki pulit ki dang pynshitom arshah ban khot hajir ïa ngi shane sha Shillong ar lai sien,”
U la buh ïa ka jingkyrpad sha u Symbud Myntri Rangbah u Bah Prestone Tynsong bad ka sorkar hi baroh ba kin don ka jingsngewsynei ïa ki bad ban bthah ïa ki pulit kin weng noh ïa kane ka ejahar.