Dawa jingithuh ka Maitshaphrang ïa ka Phan Nonglait kum ka riewshlur kynthei ba nyngkong na ki Khasi

0

Shillong, Risaw, 21: Ka Maitshaphrang ha ka sngi Palei ka la phah da ka jingthoh sha u MLA jong ka North Shillong Constituency u Bah Adelbert Nongrum ba un buddien halor ka jingkyrpad ïa u Myntri ka tnat Arts and Culture ka Sorkar Jylla ban ïakren bad ka tnat ba dei peit jong ka Sorkar India na ka bynta ban ithuh ïa ka Phan Nonglait kum ka riewshlur kynthei ba nyngkong eh napdeng ki Khasi kaba ïadon bynta ha ka jingïaleh laitluid pyrshah ïa ki bor jong ka Sorkar Bilat.
Ka Maitshaphrang ka ladep phah ruh da ka jingthoh sha u Lamphang ka Iingdorbar Thawaiñ ka Jylla u Bah Metbah Lyngdoh ha ka 1 tarik, Naitung, 2022 ba un shimkhia halor kane ka jingdawa.
“Ha ka 29 tarik, Jymmang, 2022, u Muktiar ka Iingbishar Supreme Court u Bah Daniel Stone Lyngdoh Nonglait u la pyllait paidbah ïa ka kot, “Ka Phan Nonglait’ hadien ka jingwad bniah bad ka jingïoh lum ïa ki jingtyllong jingtip ba la buh da ki Phareng. Ka Phan Nonglait ka la ïarap ïa u Syiem Tirot Sing ban ïakhun pyrshah ïa ka jingsynshar donbor jong ki Phareng bad ka long ruh ka riewshlur ba ki shipai u Syiem Tirot Sing ki la ïoh pynïap 32 ngut ki shipai Phareng katkum ka jingthoh ha kane ka kot,” ong u Convenor ka Maitshaphrang u Bah Michael N. Syiem.
“Ha u snem 1994 bad ha u snem 1995 ka Maitshaphrang ryngkat lang bad ka Seng Samla Jaïaw Laitdom ka la pynlong da ka drama surok kaba la ai kyrteng, “ka drama jong ka Phan Nonglait,’ ha ki bynta bapher bapher jong ka nongbah Shillong bad ha ka shong Nongkhlaw ha kaba la pynpaw pyrthei ïa u synñiang u bynhei jong ka Phan Nonglait ha ka jingïakhun laitluid. Ïa ka kot ba la thoh shaphang ka drama la pynmih paidbah bad ïa ka forwarding addrress la thoh da u (L) Barrister Pakem, u Vice Chancellor barim ka North Eastern Hill University,” la ong shuh shuh ka Maitshaphrang.
“Da ka jingpynmih ïa kane ka kot halor ka jingim bad u synñiang u bynhei jong ka Phan Nonglait, ngi sngew ba ka ladei ka por bad kane ka riewshlur bym shym la ïoh jingithuh ka donhok ban ïoh jaka ha ka pakit ki mynnor jong ka jingïaleh laitluid ka ri India bad ka jingsarong ïa ka pakit ki mynnor jong ka jylla jong ngi,” la bynrap shuh shuh ka Maitshaphrang.

Leave A Reply

Your email address will not be published.