Lada don tang kawei ka karkhana la jong, la pahuh kam ki samla: Vicky Marbañiang

0

Shillong, Risaw, 22: Ka Meghalaya lada ka don ïa ki karkhana kaba pynïaid hi da ki briew lajong ka lah ban aikam ai jam ïa shibun ngut ki samla kiba la nang la stad bad kiba la pyntbit ha ki jaitkam bapher bapher, ong u samla Vicky Marbañiang.
Haba kren bad ki lad pathai khubor ha kane ka sngi Palei, utei u samla na Nohwet u la ong ba kum u samla ba pyndep ïa ka laiñ engineer u ïohi ba ki don bun ki samla Khasi kiba la tbit ha kiba bun ki liang bad lada lum lang ki la kot bor wat ban shna hi ïa ki mashin bapher bapher la ka long naduh ki jait kali kum ki scooty bad kiwei kiwei. “Ngi kwah ban don la ka jong ka karkhana kaba lah ban shna hi ïa ki tiar ba donkam baroh ha kane ka jylla khnang ba yn lah ban ong la shna hi ha Meghalaya. Kam don jingmut ba n wanrah da ki mashin ryngkat bad ki briew nabar jylla ban wan trei hangne. Hynrei lada wan ki karkhana ba heh baheh bad ki samla jongngi ki la ïoh jinghikai ka jingmyntoi kan dei ïa ka jylla jongngi hi,” u la ong.
U ong ruh ba lada ka lad ka plie kin ai jinghikai shwa ïa ki samla lajong khnang ba kin trei hi ma ki ïa ki kam ki jam baroh bad ba ki tiar kiba pynmih kin dei beit na kane ka jylla khlem da donkam ban wanrah na shabar.
La ïathuh ba nyngkong hi ki kwah ban wanrah shwa da ka karkhana ban shna ïa ki tiar kiba ïadei bad ki kali lane ki autombile industry la ka jong. “Ngi lah ban shna hi nadong shadong, ki jingpynwan dur bad ka jingshna haduh ban da dep pura kan dei beit ha Meghalaya. Ka jingthmu jongngi ka long ban shna ïa ki motorcycle ne wat ka scooty ruh. Hynrei ha ka por ba nga kren ïa kane ki ong ba kadei tang ka jingpyrkhat ha lyer bad shu phohsniew. Nga pat nga shem ba kadei kaba lah ban long namar nga la dep ban kynduh ïa ki samla kylleng kylleng bad nga la ïohi ruh ia ka jingtbit jong ki ban pynwandur,” u la bynrap shuh shuh.
Hynrei ha kaba kut pat u ong ba katei ka jingangnud jong ki ka la shu kut noh tang ha shiteng namar ym don satia kiba treh ban kyrshan ne plie lad plie lynti ïa ki.
Shwa kane, u la ïathuh ruh ba bun ki mar rep na kane ka jylla la shu wan thied tad da ki briew kiba nabar jylla. U la ai nuksa ruh ba ïa ki kynja musli mula kiba pynmih na kane ka jylla ha ka por ba die ki tad hynrei ynda la dep ban sain bad song pynbha pat ki trai shnong ki hap ban thied ha ka dor kaba rem bha.
Kumta u la ong ba lada ki ïoh ïa ka jingkyrshan na ka sorkar ki lah wat ban ïarap ïa ki nongrep ha katei ka bynta ruh kaba lah ban long artad kum ka jingkyrshan ïa ki nongrep bad ha kajuh ka por ka jingai kam ai jam ïa ki samla lyngba ki karkhana kiba don.

Leave A Reply

Your email address will not be published.