Shillong, Risaw, 21: U Symbud Myntri Rangbah ka Jylla u Bah Prestone Tynsong u la kular ban sa rah ha ka jingïalang Kynhun Myntri ka ban sa long ha ka taiew banyngkong jong u bnai Naiwieng na ka bynta ban ïathir ïatai shwa ban ai jingmynjur halor ka jingdawa jong ka Meghalaya SSA Schools Association (MSSASA) ban siew tulop noh shi sien manla ka lai bnai ïa ki nonghikai skul SSA bad ban thaw ïa ka State Education Commission khnang ban weng ïa ka jingeh jong ki nonghikai skul SSA.
Kane ka jingkular jong u Symbud Myntri Rangbah ka long ha ka jingïakynduh ha ka sien kaba lai ïa ki nongïalam jong ka MSSASA ha ka sngi Thohdieng ban ïathir sani halor ki jingdawa jong ka MSSASA.
U President ka MSSASA u Bah Aristotle Rymbai ha u kyrwoh ba la phah sha ki lad pathai khubor u la ong, “ngi la ïathir sani bha halor ka jingsiew tulop sha ki nonghikai SSA na ka bynta u bnai Nailur, Risaw, bad Naiwieng sha ka Khristmas. U (Symbud Myntri Rangbah) la kular ba ïa kane ka jingdawa la shimkhia da ka tnat ba dei peit bad ka Sorkar kan sa leh ïa kaba bha tam ban pyllait noh ïa ka tulop jong ki nonghikai skul SSA shwa ka lehniam Khristmas.”
