Shillong, Naitung 26 : Ka Dorbar Synrai jong ka Iing Dorbar Thawaiñ ka Jylla kan long naduh ka 23 tarik – 30 tarik u Nailar mynta u snem.
Na kitei ki san sngi, lai sgi kan dei na bynta ki kam jong ka sorkar (government business) bad ar sngi pat na bynta ki dkhot ka Iing (private member’s business).
Haba pyntip ïa kane, u Lamphang ka Iing Dorbar Thawaiñ ka Jylla, Thomas A Sangma ha ka sngi Thohdieng u la ong ba ïa kine ki sngi long Dorbar la dep ban mynjur da ka Business Advisory Committee (BAC).
“Kumta, kane ka Dorbar Synrai jong ka Iing Dorbar Thawaiñ ka Jylla kan sdang naduh ka 23tarik haduh ka 30tarik Nailar bad ngi la rai ruh ban don san sngi ka por long dorbar hadien ba ngi la nujor na ka dorbar kaba long ha ka dorbar ba la dep,” u la ong.
Ha kajuh ka por, u Lamphang u la pynshai ruhba kam pat don kano kano ka jingpynkylla haba ïadei bad ka kam Nongïalam Liang Pyrshah kaba bat mynta da u MLA ka Mylliem, Bah Ronnie V Lyngdoh. Kumban shu kdew hangne, ka Congress ka don mynta sa saw ngut ki MLA hadien ba u MLA ka Gambegre u la shah jied noh kum u MP ba thymmai na Tura Parliamentary constituency dang shen.
“Nga kren tang ïa kaba ïadei bad ka dorbar hynrei ïa kiwei yn sa rai hadien tangba haduh mynta hi ym pat don kano kano kumba phi ïohi. Kumta nga la dep ban pynpaw ïa kaei kaba nga ïohi ba kam pat don kano kano ka jingkylla haduh mynta,” u la ong.
