Shillong, Naitung 26: Ka Liang Pyrshah ka Voice of the People Party (VPP) ha ka sngi Thohdieng ka la buh jingkylli ïa ka jingleh hok bad bym shah liang jong ka Meghalaya Public Service Commission (MPSC) ha ka jingkhmih biang ïa ki OMR answer sheet.
Lyngba ka kyrwoh kaba la phah da u Vice President ka VPP u Dr Kara H Chen ula ong ba ka party ka pynpaw ïa ka jingsngewkhia kaba jur bad ka jingbym hun ïa ka jingpynbna ba dangshen jong ka Meghalaya Public Service Commission (MPSC) ba ïadei bad ka MCS Preliminary Examination 2022-2023 ba long ha ka 4 tarik Naiwieng, 2023.
Ka jingpynbna ba la pynmih ha ka 23 tarik Naitung, 2024, ka la pynpass biang sa ïa 62 ngut ki nongïakhun eksam na ka result ba la dep ban pynbna dangshen.
Ka kyrwoh khubor ka la ong ba kane ka jingkhmih biang ïa ka OMR answer sheet ka dei kaba la leh hadien ka jingujor jong u nongïakhun eksam, ba ïadei bad ki jingkylli ba la ai ha kane ka eksam, ula ong.
Na ka liang u Dr Chen ula ong ba ka lynti kaba ka MPSC ka la rai ban khmih biang ïa ka answer sheet hadien ka jingshah ujor ka la pynsngewkhia jur bha halor ka jingleh hok bad ka jingleh khuid. Kam long satia kaba shai ba ha ka rule ne kyndon aïu ba la khmih biang ïa kane ka answer sheet.
U la ong ruh ba ka por kata hadien hynñiew bnai ba la dep pynbna ïa ka result bad ka rukom pynmih biang ïa ka result kaba bynrap, ka la pynsheptieng ïa ka jingdon ka jingthung bahaïing ne paralok. U ong ba ki nongïakhun eksam ba la pynpass hadien ka jingujor ka lah ruh ban long namar ka jingdon ki nongpynbor lane jingjied kyrpang, kaba pynmih ïa ka jingsngewkhia ba hato kane ka jingkhmih biang ïa ki answer sheet ka dei kaba la lah tang ban pynpass ïa kito kiba la pheil.
Ka VPP haba dawa ba dei ban shong bishar mardor ïa kane ka jingkhmih biang ïa ki answer sheet, u Dr Chen ula ong “Ka VPP ka dawa ba dei ban shong bishar mardor bad ba bniah bha ia kane ka rukom pynlong ka MPSC ia ka jingkhmih biang ïa ki answer sheet. Ngi kyntu ïa ka Sorkar ba kan ai jingshai halor ki rule bad ki kyndon ba ïadei bad kine ki jingkhmih biang ïa ka result bad ba pynthikna ba ki eksam ban sa long hadien hadien kin dei kiba ïaid ha ka lynti kaba lehhok bad ba shai”.
