Naduh 2026 kyrmen ban ïoh wan hiar noh ki Liengsuiñ ba heh : Dy CM

Shillong, Iaiong 14: U Symbud Myntri Rangbah ka Jylla uba khmih ïa ka tnad Transport u Ma Sniawbhalang Dhar u la ïathuh ba ka jingpynheh ïa ka kad liengsuiñ Shillong kaba ha Umroi kan sa sdang noh shen ban pynthikna ba ki liengsuiñ kiba heh kin lah ban hiar noh ha kane ka kad liengsuiñ ha u 2026.
Haba kren bad ki lad pathai khubor, u Ma Sniawbhalang u la ong “Ngi la ïoh ka khubor kaba bha. Ka Airport Authority of India (AAI) ka la khot Tender ban pynheh ïa ka kad liengsuiñ jong ka Shillong bad nga kyrmen ba hapoh u snem 2026, ngin sa lah ban ïohi noh ïa ki liengsuiñ kiba heh ban hiar ha kane ka kad liengsuiñ”.
“Ka jingshim jaka ka la jan dep bad shen ngin sa siew ïa ka bai lutksan jaka. Baroh ki kam ki long kiba ïaid beit namar kata ka daw ba ka AAI ka la lah ban khot tender kham kloi” u la ong.
Ka AAI ka la pynmih ïa ka jingpynbna tender ha ka 5 tarik Iaiong 2025 na ka bynta ban pynheh ïa ka kad liengsuiñ jong ka Shillong bad kane ka la long da ka jingshim khia bad jingïalam u Myntri Rangbah ka Jylla u Conrad K Sangma, uba la kular ban shim khia ban pynheh ïa ka kad liengsuiñ.
Ka jingpynheh ïaka kad liengsuiñ ka kynthup ia ka jingpynheh ïa ka lynti her liengsuiñ (Run Way) kaba la don lypa kaba 571 meter, da kaba yn pynheh sha ka 2,400 meter. Kane kan pynsuk ruh ïa ka jingher bad jinghiar ki liengsuiñ A-320 type ha Shillong. Nalor kata, kane ka projek ka kynthup ïa ka jingpynheh ïa ka Terminal bad ka Apron, ryngkat bad ki kam pynroi bapher bapher. Katkum ka jingpynbna tender, ka jinglut jingsep jong kane ka projek ka long .11,944.47 lak tyngka ne 119.44 klur tyngka, bad ka por ba la khmih lynti ban pyndep ka long 18 bnai.
U Myntri Rangbah ka Jylla Conrad K. Sangma u la ong “Kane ka dei ka khyllipmat jong ka jingsngewhun mynsiem bad jingkyrmen kaba khraw na ka bynta ka Jylla Meghalaya. ki lad ki lynti na ka bynta ki samla jong ka Jylla namar hadien ba la dep, kane ka projek kan kyntiew shuh shuh ïa ka kam jngohkai pyrthei ha ka jylla”.
U Myntri Rangbah u la shim khia halor kane ka kam bad ka Sorkar Pdeng ha ki kyrdan bapher bapher. ïa kane ka projek la shim kum u mawjam jong ka jingangnud jong ka Meghalaya ban kiew ka kam jngohkai pyrthei bad ka jylla ruh kan long kum ka jaka bei tyngka kaba kongsan ha ka ri.
Ka AAI ka la aiti ïa ka Draft Master Plan ban pynheh ïa ka liengsuiñ ha u bnai Nailar 2024 bad ka jingshim jaka na ka bynta ka jingpynheh kaba 22 Acre kaba donkam na ka bynta katei ka projek ka la ïaid shakhmat. Ka jingpynheh ïa ka kad liengsuiñ Shillong la khmih lynti ba kan pynbha shibun ïa ka jingïadei bad ki nongbah ha kylleng ka ri India, kaba plie lad ïa ka jingwan jngohkai pyrthei kaba kham bun, ka jingleit jingwan jong ki kam khaïi, bad ka jingpynïasoh lang ia ka Jylla bad kiwei pat ki Jylla ka Ri.