Shillong, Risaw 23 : Ki klass na ka bynta ki nongpule doktor MBBS ba nyngkong eh ha ka PA Sangma International Medical College and Hospital kin sdang naduh u Nailar 2025, ïathuh u Chancellor jongka University of Science and Technology Meghalaya (USTM) bad u Chairman ka ERD Foundation u Mahbubul Hoque mynta ka sngi.
ïa kane ka PA Sangma Medical College bad Hospital la seng da ka USTM bad ERD Foundation bad la plie mawnong rim da u Myntri Rangbah ka jylla u Conrad K Sangma ha phyllaw ka USTM University hi ha ka 3 tarik Risaw.
“ Ha u Naitung 2024 la buh thong ban pyndep tei ïa kane ka College bad Hospital namar naduh mynta la sdang ban pyntrei shaid shaid ïa ka kam. La khmih lynti ba ha u Risaw 2024 yn sdang ban plie shwa ïa ka Hospital bad hadien kata ïa ki klass MBBS ha u 2025” ong u Hoque ha ka jingïalang mir jingmut halor ka koit ka khiah ha USTM.
U la ong ba kino kino ki briew kiba kwah ban kyrshan na ka bynta kane ka projek ruh kin ïoh bun ki jingmyntoi. U la ïathuh ruh ba ha ki arsnem ba sdang jong kane ka college bad hospital kin don bun ki jingai jinghikai, jingïamir bad ïathir jingmut ban pynlong da ka USTM. Kin don ki jingïatrei lang bad baroh ki tnad ba dei ïa ka koit ka khiah bad wat bad ki bor district jong kane ka thaiñ shatei lam mihngi bad kindon ruh ki jingphah pyntbit ïa ki doktor shabar ri ruh.
“ Kane ka rukom ïamir bad ïathir jingmut bad ki doktor ba pawnam kan ïai bteng haki por ban sa wan ruh khnang ban ïoh jingmyntoi bad tip bniah bha shwa ban sdang ïa kane ka college bad hospital.
Kawei na ki thong ba hakhmat jong kane ka Medical College bad Hospital ka dei ka jingtei ïa ka hospital kaba 250 jingthiah ka ban biang lut nadong shadong bad ka thong ka long ban ai jingsumar ei beit ïa kiba duk ba kyrduh.
Kane ka tnad pule doktor kan khring ïa ki nongpule ym tang napooh ka ri hynrei wat na ki ri hapoh ka kynhun ASEAN ruh.
Ki don palat 50 ngut ki doktor ba paw nam kiba la wan ban ïashim bynta ha kane ka jingïamir jingmut mynta ka sngi halor ka phang ban sdang ïa kane ka PA Sangma International Medical College & Hospital.
