Nongstoiñ, Nailur 6: Ka seng Hynñiewtrep Youths Council Laitkseh Area unit, ha ryngkat ka Nongstoiñ Circle ba kynthup ïa u president ka la leit ban kynduh ïa u Executive Engineer PWD Roads Nongstoiñ Division, ban dawa na u ban bthah ïa u kontraktor ba pyntrei ïa ka surok Marngor haduh Phyllut kaba don kumba 4 km eiei ban pyntrei noh kumba ka dei ban long.
Ka jingpyntrei ïa katei ka surok ka la sdang naduh u snem 2019, hynrei ka ba sngewsih ka long haduh u ne u snem ym pat lah satia ban pyndep. Kumta na ka liang ka seng ka la dawa na u EE ba un bthah ïa u kontraktor, ba un wan ha ka joint inspection ka ban sa khot da ka Department, namar ha ba pyrshang ban ïa kren ba u tei u Kontraktor, u ai ki daw ba bun jait.
Hynrei, na ka liang u EE u la kular ban un shimkhia ïa kane kam bad u la ong ruh ba wat ban ba cancel noh ïa katei ka tender jong u tei u Kontraktor ruh ym banse ban leh. Na ka liang ka seng ruh kan sa peit pyrman lada kam urlong katkum ba la ïa kut, namar ka seng ka shim da kiwei ki lad ki lynti.
Kumba long mynta katei ka surok ym lah shuh ban ïaid kali, hynrei haba phai ha ki por bym pat trei ïa katei ka surok dang don hateng hateng ba ki kali ki lah ban ïaid.
Nalor kata ka jingtrei torti ka long palat pud ha kaba ka jingtrei ka dei 4 km, hynrei haduh mynta tang 200 meter u dang trei katba ka por ka la kut artad. Kumta ka seng ka kren shai lada u tei u Kontraktor um trei noh, ka seng kam banse ban ai da ka tyngeh, ong ki nongïalam HYC Laitkseh Area unit.
