Mawkyrwat, Lber, 30 : Kum shibynta ban wanrah ka jinglaitluid, ka jingïaid beit ïaid ryntih bad ka jingshongsuk jingshong shngaiñ ha ka sngi thep vote sha ka Lok Sabha ka ban sa long ha ka 19 tarik u bnai Ïaïong, 2024.U Deputy Commis-sioner (Excise) jong ka South West Khasi Hills District, Mawkyrwat hapoh ka kyndon aiñ 135 (c) jong ka Representation of People Act 1951 ula pynbna ba ha ka 17, 18 bad 19 tarik u Ïaïong, 2024 kaba hap ha ka por kaba kynthup ïa ka 48 kynta ka ban neh haduh ka kynta ba khatduh ba pynkut ïa ka sngi thep vote kum ki sngi tyrkhong kyiad.
U la pynbna ruh ïa ka sngi jingñiew vote ka 4 tarik u Jylliew, 2024 kum ka sngi tyrkhong kyiad ha baroh kawei ka South West Khasi Hills District. Da kane ka hukum la khang ba baroh ki dukan kyiad ba kynthup ïa ki Bars/canteens, kiba ju die madan kin khang khyrdep ha kitei ki tarik. Kino kino kiba pynkheiñ, kin shah pynshitom katkum ka Excise Rules & Acts.
