Shillong, Lber 30: Wat hadpeng ka jingpykhreh ban rakhe ïa ka sngi burom kaba kyntang jong ki riew Khristan ka Paskha, na ka liang ki paid riewngeit katholik ha ka sngi saitjaiñ kila tep don burom noh ïa ka Sr. Rosario Lopez Herraria ha St Xavier’s Convent Chapel, Tura.
La ong ba ka Sister. Rosario kaba la don 94 snem ka rta, kadei kaba na ka ri Spain bad ka la khlad noh ha ka sngi Palei ha Nazareth Hospital, Shillong.
U Rt Rev. Bishop Andrew R Marak ula ïalam ïa ka jinglehniam tep ïa ki riewniam ha kaban leh burom khatduh ïa kane ka Sr. Rosario ïa kaba la wan ban ïashimbynta da bun ngut ki briew na kylleng ki jaka bad kiba don ha ki kam ki bapher bapher bad ki paralok ba ïa ithuh ithaw ïa ka.
Lah ban pynkynmaw ba ka Sr Rosario ka la pynlut da ki phew snem ha rilum Garo ban ïarap kyrpang eh ïa ki khynnah, ki rangbah bad ïa ki longkmie bad la seng ruh ïa kawei ka jaka kaba heh kaba long kyrpang na ka bynta jong ki, kaba la tip kum ka Bethany Society ha Tura.
Ka Sister Rosario kadei ruh ka dkhot jong ka Missionaries of Christ Jesus (MCJ) bad kadei ka mishonari kaba la pawnam bha ha kylleng ka rilum Garo kaba la ïalam ban tei ïa ka ïing na ka bynta ki khynnah kiba don jingïapher ha ka dkhot met bad ban ai ïa ki ïa ka jingnang jingstad kaba paka lyngba ka jingpyndonkam ïa ka Braille bad Sign Language, katba ïa ki rangbah bad ki longkmie la ai jinghikai ha ki kam thaiñ jingthaiñ bad ka kam rep kam riang kaban ïarap ïa ki ba kin khlaiñ ha ka ïoh ka kot.
La ong ruh ba ka Sister Rosario ka la ïoh pdiang ruh ïa ka Meghalaya’s Pa Togan Nengminja Award halor ki jingnoh synniang ki jong ka sha ka imlang sahlang.
