Shillong Lber 30: Kumba ju long manla ka por na ka liang ki shipai jong ka Border Security Force (BSF) Meghalaya Frontier, ka la pynlong ïa ka “Seema Darshan Programme”, ha ka sngi Ba-ar na ka bynta ki samla pule bad ki nonghikai jong ka Commerce College Shillong ha Border Out Post Barmanbari kaba dei ka jaka jong ki shipai.
Ha katei ïa ka prokram la ai ka jingbatai kaba bniah ïa ki samla pule shaphang ka rukom treikam kaba kongsan jong ki shipai BSF ha ki kam ïada ïa ki jaka khappud jong ka ri.
La pdiang sngewbha ïa ki samla pule bad ki nonghikai da u Rajiv Kumar uba long u Commandant jong ka 193 Bn BSF ha ryngkat ka jingdon ki ophisar bad ki shipai BSF.
Ki BSF kila pyni ïa katei ka kynhun ïa ki tiar siat bad ïa ki tup ki man kaba ki shipai ki pyndonkam ha kaban ïada ïa ka ri bad kane ka jingpyninam ka long ruh kum ka lad ban pynsngewthuh khambha ïa ki samla shaphang ki shipai ïada khappud bad ïa ka jingkloi ban len ïa la ka jingim ban ïada ïa ka ri.
Ha kaba ïadei bad kane ka prokram na ka liang ki nonghikai bad ki samla pule kila pynpaw ïa ka jingsngewnguh ïa ka BSF kaba la pynlong ïa kane ka prokram bad kumjuh ban sngewthuh ïa ka rukom pynïaid ia ka Border Haat, Balat kaba don ha khappud bad ka ri Bangladesh.
