Shillong, Nohprah, 18: Uwei dkhot ka Khasi Students’ Union (KSU) ha sngi u Blei u la ieng marwei harud surok Polo, Shillong ryngkat bad ka plakad ban pyni sha u Myntri Rangbahduh ka ri u Narendra Modi katba u shong da ka kali ban leit ïashim bynta ha ka jingïalang rakhe dap 50 snem jong ka North Eastern Council (NEC) kaba la long ha madan Polo, Shillong.
Une u dkhot jong ka KSU u la rah ïa ka plakad ba la thoh, “sha u Myntri Rangbahduh, pyntreikam noh ïa ka Inner Line Permit (ILP), weng noh ïa ka Citizenship Amendment Act bad ka Indo-Nepal Treaty, pynurlong noh ïa ka Central Agricultural University, ithuh noh ïa ka ktien Khasi hapoh ka Khyrnit Baphra ka Riti Synshar jong ka ri India, pynbeit noh ïa u pud u sam.”
Katkum ka jingai jingtip jong u General Secretary ka KSU u samla Donald V, Thabah u la ong ba ka seng kam banse ban rah da ka plakad ha ka jingwan iuhkjat jong u Modi ha nongbah Shillong kum ka dak ban pynpaw ka jingpyrshah halor ka jingbym suidñiew jong ka Sorkar Pdeng ïa ki jingdawa jong ka Seng khnang ban pyni sha u Myntri Rangbahduh ka ri namar ka jingbym ïohlad ban kynduh markhmat watla u la wan khnang ha Shillong.
U General Secretary ka KSU u la ïathuh ba ka KSU ka ladep phah ïa kitei ki mat jingdawa sha ka Sorkar Pdeng naduh u Naiwieng, 2020 bad namar ka jingbym ïakynduh markhmat bad u Modi ka seng kam banse ban shu pynlong noh da ka jingrah plakad hapdeng ka jingpyrkhing kaba jur bha jong ki bor Pulit mynta ka sngi ha nongbah Shillong.
