Shillong, Jymmang 24: Ha ka jingrakhe ïa ka sngi pynneh pynsah ïa ki ngap na ka World Bee Day, ka NESFAS ka la pynlong ar tylli ki jingïalang ba kongsan kiba thmu ban pynpaw ïa ka bynta ba kongsan jong ki ngap bad ka jingtip tynrai shaphang ka mariang ha ka jingsumar ïa ki jingthaw ba im bad ka jingim kaba neh.
Ki jingrakhe ki kynthup ïa ka jinghikai halor kumno ban ri ngap ha Laitlyndop, East Khasi Hills kaba la pynlong ha ka 19 bad 20 tarik Jymmang, 2025.
Kine ki prokram ki dei shi bynta jong ka projek jong ka NESFAS ban pynneh pynsah ïa ki jingthaw ba im nangta ban kyntiew ïa ka rukom pynmih bam bad ruh ïa ka kamai kajih jong ki nongshong shnong.
Ha kane ka prokram ki la don bun bha ki nong ri ngap kiba la wan ban shim bynta na ki 14 tylli ki shnong na Ri Bhoi bad East Khasi Hills ban ïa syllok bad ïa pyni lang ïa ki buit jong ki kaba ïadei bad ka rukom ri ngap.
Na ka liang u Bah Bada Shabong uba dei u nong ri ngap na ka shnong Nongpriang u la ong ba u kwah ban ai khublei ïa ka NESFAS kaba la plie lad ban ïoh rakhe ïa katei ka sngi kyrpang ban pynneh pynsah ïa ki ngap. “Ngi dap da ka jingkmen kaba khraw ban ïoh ïa kynduh lang ïa ki nongri ngap na kylleng ki shnong jong ka jylla bad nga kmen ruh ba kane ka jingïasyllok ka la ai jingmut shuh shuh,” u la ong.
Katba na ka liang ka Gratia E Dkhar kaba dei ka Sr. Associate , Programme NESFAS ka la ong ba ki ngap ki pyni ïa ka dak kaba shynna ba kumno ki bynriew kin im ha ka jingsuk bad ka mei mariang. “Ka jingim jong ki ka shong kumno ngi sumar bad ngi pynneh pynsah ïa ka mariang,” ka la ong.
Ka ong ruh ba ki umngap ba bunjait kiba wan rah ha katei ka sngi ki pyni ïa ka jingbun jait ka rukom pynmih ngap bad bun jait ki jingbam ba ki ngap ki bam.
Ha kane ka prokram ka la don ruh ka jingïa mad ïa ka ngap ha kaba ki nong ri ngap ki la ïoh ban pyni ïa ki ngap ba pher bapher ba ki wanrah.
Hadien kane u Bah Welcome Synrem, uwei na ki nongri ngap na Laitlyndop u la ïalam ruh ïa ki khynnah skul ban leit sha ki sharing lum ban pyni ïa ki khynnah ïa ki jait syntiew kiba ki ngap ki sngew tynnad.
