Shillong, Jymmang 24: Ki nongtrei Muster roll kiba trei ha Mawphlang PHE Electrical Division ki la pynpaw ka jingsngewsih ba ki la mad ïa ka jingshah khate tulop na ka bynta lai sngi na ka ki 31 sngi ha ki bor ba dei peit.
Ki pynpaw ba kane ka jingleh beiñ da ki bor ba dei peit ïa kane ka tnat kaba don ha Mawphlang ka la ktah shikatdei eh bad ki ïathuh ruh ba ka la don mynta ar bnai shiteng ba ki la shu ap hi dngong ban ïoh ïa la ka bainong hynrei phewse ka bainong ka long pynban da kaba shah khate haduh lai sngi.
“Mynshwa ha ka por u (L) Bah SK Sun uba dei u Engineer bad Chief Engineer barim kane ka tnat ym ju don koit kaba kum kane ka jingshah ot tulop, hynrei kynsan mynta ka la mih kane ka jingshah ot tulop ki nongtrei”, ong ki nongtrei Muster roll.
“Ngi pynpaw ïa ka jinglyngngoh kaba khraw bad kylli ruh na kaei ka daw ba la ot ïa ka tulop haba ngi ju wan trei beit manla ka sngi. Kumno yn shu ot tulop na ngi? Ngim tuklar ïa ka jingthep kam thep jam thymmai jong ki hynrei ngi kwah ban ïoh tang ïa kaba ngi dei hok ban ïoh namar ka um syep jong ngi kaba ngi la pynjaw kam dei ban jaw bakla shawei pat, hynrei lada ka long da kumwei pat, kata ka um syep jong ngi kan sa trei la ka jong ka kamram ha kita kiba ibeiñ ïa ngi ki rit ki ria,” la kren diaw ki nongtrei Muster roll.
“Kiba donbor ki ïoh ïa ka tulop manla u bnai bad kata ruh ha ka dor kaba heh bad kaba palat arphew lane shiphew shah ïa kaba ngi ïoh hynrei ngi pat nalor ba ngi slem ban ïoh ïa ka tulop hynrei ngi shah ot pat sa kumne. Hato u paidbah u hun sieh ban shu khñium na ïing khlem da pynsngew lem ïa kane ka jingeh? la buh jingkylli ki nongtrei Muster roll.
“Lada ka ïai long sah ha kane ka rukom, ngim banse ban phah tuklar lem ha ki bor ba halor kane ka jingshah khñiot beiñ jong ngi kum ki nongtrei Muster roll hangne ha Mawphlang PHE Electrical Division. Ngim dei ki biej ban shu kohnguh ne ban shu khñium na la ïing, ngi don ka jingnang jingstad kaba ngi tip ïa kaei kaba dei bad kaei ka bym dei kumno ban leh ïa ka,” ki la bynrap.
